گونئی آذربایجان تورکلریندن آذربایجان جومهوریتی دؤولتینه اورمو گؤلو قونوسوندا موراجیعت
آذربایجان جومهوریتی نین سایغی دگر جمهور باشقانلیغی و میلی مجلیس باشقانلیغی نین یوکسک مقامینا؛
بیلدیگینیز اوزره ایران آدلاندیریلان اؤلکه نین چرچوسینده یاشایان اون میلیونلارجا گونئی آذربایجان تورکو گونوموزده چوخ سایدا مدنی، کولتورل و اکونومیک پرابلم لر یاشاماقدا و آیری سئچگیلیگه معروض قالماقدادیر. یالنیز سون ایللر ایچرسینده گونئی آذربایجان ائله بیر جیددی سورونلا قارشی قارشییا بوراخیلیبدیر کی خالقیمیز اوچون بیر اؤلوم-قالیم موجادیله سی حالینا گلیبدیر. بو سورون "اورمو گؤلو مساله سی" دیر.
طبیعی گؤزللیکلری ایله "آذربایجانین گلینی" آدلاندیریلان اورمو گؤلو بیر نئچه ایلدیر کی جیددی بیر قوروما تهلوکه سی ایله اوز اوزه قالیبدیر. بیر زامانلار دونیانین ایکینجی ان بؤیوک دوز گؤلو اولان اورمو گؤلونون آرتیق 60 فاییزی قورویوبدور و آرتان بیر سورعت ایله ده قوروماغا داوام ائدمکده دیر. بئله جه ده گونئی آذربایجانین تام اورتاسیندا بؤیوک بیر دوز چؤلو یارانماقدادیر. میلیاردلارجا تون دوزو بولونان بیر چؤلون اورتایا چیخیشی گونئی آذربایجانین بؤیوک بیر قیسمینی یاشانماز حالا گتیرجکدیر. یئل ایله داغیلان دوز بؤلگه نین بوتون تاریم اراضیسینی تخریب ائدیب ایقتیصادی دارلیق و خسته لیکلر نتیجه سینده خالقیمیزین بؤیوک بیر بؤلومونو ایرانین اورتا و گونئی بؤلگه لرینه کؤچمه گه مجبور بوراخاجاقدیر. بو ایسه وطنیمیزین خارابا قالماسی و خالقیمیزین یاد ائللرده دیدرگین دوشمه سی دئمکدیر.
هر نه قدر ایران دؤولتی بو سورونون قوراقلیق کیمی طبیعی سببلردن اورتایا چیخدیغینی ایدیعا ائدسه ده هارداسا بوتون اوزمانلار بو مساله نین طبیعی یوخ بلکه داها چوخ صونعی سببلردن قایناقلاندیغینی ایرلی سورمکده دیرلر. بیر چوخ اوزمان و متخصیص حاکیمیتن بو مساله نی یارادماقلا اورتا و اوزون مودتلی سیاسی هدفلر گوتدوگونو دیللندیرمکده دیر. بوگونه قدر بو پرابلئمین حللی اوچون حاکمیت طرفیندن هانسی سا بیر فعلی آددیم آتیلماماسی بو قناعتی داها دا گوجلندیریر.
البته کی گونئی آذربایجان تورکلری بو اؤلومجول دورومون فرقینده دیرلر و بو موناسیبت ایله ده سورونون اورتایا چیخیشیندان بری گئنیش میقیاسلی بیر مدنی موجادیله باشلادیبلار. سون آیلاردا گونئی آذربایجان شهرلرینده میدانا گلن پروتستو یوروشلری بونون ان آچیق میثالیدیر. یالنیز نه یازیق کی ایران حاکیمیتی بوتون ایستک و اعتیراضلاری ائشیدمزلیکدن گلمکده، بوتون قارشی سس و حرکتلری باسدیرماقدا و اورمو گؤلو اوچون هر هانسی بیر چاره قیلماماقدا ایصرارلی دیر.
حال دورم بئله ایکن، بیز بیر قوروپ گونئی آذربایجان تورکو، آذربایجان جومهوریتی دؤولتی اولاراق سیزه موراجیعت ده بولونوب و خواهیش ائدیریک کی آذربایجان میلتینین دونیاداکی تمثیلچیسی کیمی اؤز سویداشلارینیزین موقدراتینا قئیدسیز قالمایاسینیز و اورمو گؤلو مساله سینده اینسان سئور و مدنی دستکلرینیزی بیزدن اسیرگه مه یسینیز. خوصوصی ایله اورمو گؤلو مساله سینین دونیا ایجتیماعیاتینا چیخاریلماسیندا سیزین رولونوز و دستگینیز سون درجه اؤنملی و حیاتی اولماقلا برابر گونئی ده کی باجی و قارداشلارنیزا دا بؤیوک اورک دایاغی اولاجاقدیر.
ان درین سایغی لارلا؛
بیر قوروپ گونئی آذربایجان تورکو
10/11/2011-19/08/1390