آزربايجان ميللي سورودو
(هيمني)
مير رحيم ولائي
ائي وطنيم آزربايجان!
ابدي اودلاردان نيشان
آدلي سانلي گئچميشين وار
سن بؤيوتدون قهرمانلار
قوجا شرقين چيراغيسان
آزادليغين بايراغيسان
تاريخ بويونجا ياديگار
ايفتيخارلي آثارين وار
سنسه ن بيزه آنا وطن
سنسه ن بيزه نئعمت وئره ن
سنسه ن بيزه روح-و روان
ياشا، ياشا آزربايجان!
ال اوزاتدي يادلار سنه
پوزماق اوچون عيززتيني
قالخدي شرفلي فيرقه ميز
حيفظ ائيله دي حؤرمتيني
آزادليغي برپا ائديب
نيشان وئردي قودرتيني
آرزي ائدير ائللريميز
دونيا بويو شؤهرتيني
سنسه ن بيزه آنا وطن
سنسه ن بيزه نئعمت وئره ن
سنسه ن بيزه روح-و روان
ياشا، ياشا آزربايجان!
آزربايجان، آزربايجان!
آسلانلارين مكانيسان
گؤزه ل گونلر گتيريبسه ن
ستتارخانلار يئتيريبسه ن
سن قوردوغون يئني حيات
خالقيميزا وئردي نيجات
قوي يوردوموز جننت اولسون!
دوشمن باغري قانلا دولسون!
سنسه ن بيزه آنا وطن
سنسه ن بيزه نئعمت وئره ن
سنسه ن بيزه روح-و روان
ياشا، ياشا آزربايجان!
بوندان سونرا آزربايجان
بير رؤوضه-يي ريضوان اولار
گئرچكله نه ر تزه حيات
كؤهنه دونيا ويران اولار
داغلار گوله ر، باغلار گوله ر
چؤللر بويو گولزار اولار
ياغي اگه ر قدم قويسا
باغري بوتون آل قان اولار
سنسه ن بيزه آنا وطن
سنسه ن بيزه نئعمت وئره ن
سنسه ن بيزه روح-و روان
ياشا، ياشا آزربايجان!
١- بير سيرا قايناقلاردا "قوردو ميللي دؤولتيني"
٢- بير سيرا قايناقلاردا "سن قوردوغون ميللي دؤولت"
٣- بير سيرا قايناقلاردا "چيچه كله نه ر تزه حيات"
آزربايجان ميللي سورودو (هيمني)
«ميللي سورود هر بير خالقين آنديدير!»
مير رحيم ولائي- آزربايجان ميللي مجليسينين کاتيبي
هر ميللتين ماهنيسي و ميللي سورودو اولدوغو کيمي آزربايجان ميللتينين
ده اؤزونه مخصوص ميللي سورودو واردي. آزربايجان ميللي سورودونو
خالقيميزين قوجامان و موباريز شاعيري سئييد مئهدي ائعتيماد ناطيقي
يازميش، موسيقيسيني ايسه جهانگيرزاده (جهانگير جهانگيروف)
بستهلهميشدير. بو سورود ٢١ آذر ميللي نئهضتي نتيجهسينده اؤلکهميزده
دئموکراسي بير اوصولون يارانيب، ظولم و اسارتدن خيلاص اولموش آزاد و
خوشبخت ياشايان آزربايجان خالقينين سسيني ترننوم ائدير.
بو سورود ميللتيميزين اؤز شيرين، دوغما آنا ديلينده يازيلديغي اوچون
اونون موسيقيسي ترننوم ائديلديکده هر بير آزربايجانلينين روحونو
اوخشايير و اوندا هيجان و بؤيوک روح يوکسه کلييي يارادير. ميللي سورود
ترننوم ائديله رکن هر بير ناموسلو و ويجدانلي آزربايجانلي و آزادليق
سئوه ر ايران زحمتکشلري ميللي حؤکومت دؤورونده فيرقهميزين رهبرلييي
ايله قورولان خوشبخت و سعادتلي گونلري و آزربايجان خالقينين الده
ائتدييي بوتون ناييلييتلري گؤزونون قارشيسيندا موجسسم ائديب، او خوشبخت
گونلري ياد ائدير.
ميللي سورود هر بير خالقين آنديدير. اونا گؤره ده او، موقددسدير.
آزربايجان خالقينين ميللي سورودو خالقيميزين اؤز آزادليغي و
ايستيقلالييتي اوغروندا آپارديغي موباريزهلرين رمزيني اؤزونده ايفاده
ائدير. بو سورود آزربايجان`ين ميليونلارلا زحمتکش فهله و کندليلرينين
و فداکار فداييلرينين ديله ک و آرزيلاريني و اونلارين نجيب
دويقولاريني ترننوم ائدهره ک اونلاري جوشقون ايفتيخار حيسسي ايله
موباريزهيه دعوت ائدير. سورودون بيرينجي بندي بئله باشلانير:
ائي وطنيم آزربايجان،
ابدي اودلاردان نيشان،
آدلي- سانلي گئچميشين وار،
سن بؤيوتدون قهرمانلار.
قوجا شرقين چيراغيسان،
آزادليغين بايراغيسان،
تاريخ بويونجا ياديگار،
ايفتيخارلي آثارين وار.
سنسه ن بيزه آنا وطن،
سنسه ن بيزه نئعمت وئره ن،
سنسه ن بيزه روح-و روان،
ياشا، ياشا آزربايجان!
سورودون بو بندي اودلار- آلوولار اؤلکهسي اولان آزربايجان`ين
ايستيقلاليني و خالقيميزين آزادليغيني تاريخ بويو ايشغالچيلاردان
قورويان، ظولم و اسارته قارشي عوصيان قالديران موباريز قهرمانلاريميزين
سيمالاريني گؤز قاباغيندا تجسسوم ائدير. ميللي حؤکومتيميزين مرکزي
اولان تبريز شهه ري بورادا اؤزونون قوجا شرق قاپيسيندا آزادليغين
پارلاق اولدوزو اولدوغو و هميشه اؤز تاريخ و مدنييتي ايله فخر
ائتديييني بير داها خاطيرلادير. ايکينجي بند:
ال اوزاتدي يادلار سنه،
پوزماق اوچون عيززتيني،
قالخدي شرفلي فيرقهميز
حيفظ ائيلهدي حؤرمتيني،
آزادليغي برپا ائديب،
نيشان وئردي قودرتيني،
آرزو ائدير ائللريميز،
دونيا بويو شؤهرتيني،
سنسه ن بيزه آنا وطن،
سنسه ن بيزه نئعمت وئره ن،
سنسه ن بيزه روح-و روان،
ياشا، ياشا آزربايجان!
ايکينجي بندده ده آزربايجان دئموکرات فيرقهسي خالقيميزين بوتون آمال و
آرزولاريني تمثيل ائدهره ک زحمتکش کوتلهلره اؤز موباريزهلرينده
رهبرليک ائديب تاريخي نئهضتيميز ٢١ آذرده ايرتيجاع اوصولونون آلت اوست
اولوب يئني بير ميللي- دئموکراتيک حؤکومتين يارانماسيني خاطيرلادير.
ميللي سورودون سونو آشاغيداکي بند ايله قورتارير:
آزربايجان آزربايجان
آسلانلارين مکانیسان
سن قوردوغون يئني حيات،
خالقيميزا وئردي نيجات،
گؤزه ل گونلر گتيريبسه ن،
ستتارخانلار يئتيريبسه ن،
قوي يوردوموز جننت اولسون،
دوشمن باغري قانلا دولسون،
سنسه ن بيزه آنا وطن،
سنسه ن بيزه نئعمت وئره ن.
سنسه ن بيزه روح-و روان،
ياشا، ياشا آزربايجان!
آخيرينجي بند آزربايجاندا قورولموش ميلي حؤکومتين خالقيميزا يئني حيات
وئرهره ک شن و فرحلي گونلر گتيرديييني خاطيرلادير.
شرقين قاپيسيندا يانان بو آزادليق مشعلينين شوعاعلاري ايرتيجاعنين
گؤزونه اوخ کيمي سانجيلدي. ايران ايرتيجاعسي ايمپئريياليستلرين کؤمه يي
ايله اؤلکهميزي غصب ائتدي. موقددراتيني اؤز الينه آلميش آزربايجان
خالقينين بير ايل موددتينده ياراتديغي مدني، ميللي ساحهلر و ميللي
آبيدهلر دوشمن طرفيندن يئر ايله يئکسان ائديلدي. لاکين بونا
باخماياراق ميللي آزادليق حرکاتينين تاثيرلري آرادان گئتمهميشدير.
ايرتيجاع جاسوسلاري خالقيميزي هر آدديمدا ايزلهدييينه باخماياراق،
ايندي يئنه ده موقددس ميللي سورودوموز گيزلي صورتده اوره کلرده و
دوداقلاردا بؤيوک روح يوکسه کلييي ايله ترننوم ائديلمکده دير.
بونا شاهيد خالقيميزين فداکار اوغوللارينين دار آغاجي قارشيسيندا
شهامتله ميللي سورودو اوخومالارني گتيرمک اولار. ايندي ده بو سورودون
آهنگيني ائشيتديکده خالقيميز ايختييارسيز صورتده گؤزلريندن ياش آخيب
گئچميش بختييار گونلري آرزيلايير. بو سورود خالقيميزين ايلييينه قده ر
ايشلهميش و اونا قهرمان موباريز يولداشلاريميزدان بير ايرث کيمي
ياديگار قالميشدير.
ميللي سورودوموز آزربايجان خالقينين ايرتيجاع علئيهينه قالديرديغي
آزادليق بايراغينين نيشاني اولوب، اونون دالقالاري بوتون شرقه
ياييلاراق خالقيميزين مغلوب ائديلمه ز اولدوغونو بير داها ثوبوت ائدير.