سیمبول اطرافیندا اولان موثبت دییالوق
حورمتلی سویداشلار؛
گونئی اذربایجان میلی حرکتی ایچریده نئچه آیدی موزاکیره حالیندا اولان میلی سیمبول مسئله سی و ایرائه اولان (آی-اولدوزو قارا) طرحین اطرافیندا گئده ن موباحیثه، کئچن نئچه ایلین بویوندا دئموکراتیک پئرئنسیبلره اویغون چوخ موثبت بیراورتامدا و منطیق لی دییالوق چرچیوسینده تارتیشماسی سورن یئگانه موضودور. سون گونلرده بو مسئله گونئی آذربایجان تیلویزییونو(گوناز تی وی) دده بحثه قویولماقلا یئنی مرحله یه وارید اولموشدور. بئله لیکله موضوع کامویونون دیققه تینه سونولموشدور.واورادا مسئله نین اوزرینده گئدن تارتیشمالارین مووافیق یا موخالیف طرفلرینین نظرلرینین هانسی دوغرو اولوب -اولمادیغیندان داها اونملی قونونون دوزگون و اوصولی شکیلده ایرلی گئتمه سی و سایین اوبالی به یین دوغرو - دوروست جمع بندلییی وسونوج آلماسی گوزه چارپیردیر. اینانیرام بوکیمی ایشلر حرکته،چئشیدلی قونولاردا موباحیثه و موزاکیره لر زامانی چوخ گئنیش میقیاسدا یاردیمجی اولا بیلر.
بورا کیمی سورن تارتیشمالاردان بللی اولور کی میلی سیمبولون یارانما ضرورتی و اونون یارانماسیندا بوتوو آذربایجان مسئله سی و گونئیین موباریزاتی شراییطی کیمی ایستیراتئژیک موریدلرده اورتاق نظرلر واردیر و او نوقطه لرده کی گوروش آیریلیغی وار اونلاریندا حللی اوچون هر ایکی طرفده حاضیرلیق مووجوددور.ملی سیمبولو یارانماسی اوچون اکثریتین موثبت اوی وئرمه گه ره یینی دوشوننده بئله نظره گلیر کی مسئله یه شخصی، گوروهی وتشکیلاتی آچیدان یوخ بلکه ملی منافع آچیسیندان باخماقلا و غئیراوصولی تنقید ومودافعه ائدنلری نظره آلماماقلا وائله جه ده آراقاریشدیرماق ایسته یه نلره ایمکان وئرمه مه شرطی ایله چوخ اولوملو سونوجلارا وارماق مومکوندور.
گئچن جوما آخشامی (تی وی)ده گئده ن موزاکیره لری بیر ایکی گیچیک موریدلری اوجوملده ن:(بیر قوزئیلی آغساققالیمیزین قونودان دئتایلی شکیلده تانیشلیقلاری اولمایارق نظر وئرمه لری و غئیر اوصولی شکیلده تنقید ائده ن ایکی شخصه حورمتلی دوکتور اسد صادیق ودوکتور سولیمانی جنابلارینا یئر وئرمیی ) نظره آلماساق چوخ اولوملو و قوروجو(سازنده) دیرلندیرمک اولار.البته میلی سیمبول طرحینی ایرلی سوره ن عزیزلر ده قاتیلا بیلسه یدیلر داهادا یاخشی اولا بیلردیر.بو آرادا سایین احمد اوبالی و طرحی ایرلی سوره ن میلی فعاللاردان ایشی دوغرو- دوروست یونلتدیکلری وگوستردیکلری صبر،تمکین و نزاکتده ن دولایی تشکور ائتمک لازیمدیر.بئله لیکله اومودوار اولماق اولار کی شخصی،گوروهی وتشکیلاتی ماراقلاردان اوزاق میلی منافعه دایاناراق منطیق لی دییالوق چرچیوسینده ویارانمیش سورغولاری و نیگرانچیلیقلاری جاوابلاندیرماقلا اورتایا آتیلمیش (آی-اولدوزو قارارنگلی)سیمبولون اوزرینده آنلاشماق ان یاخین زاماندا مومکون اولموش اولسون.
یوخاریدا قئید اولدوغو کیمی اوزون سوره دیر میلی حرکت ایچریسینده بو طرح کیمی دئموکراتیک زمینده موزاکیره وموباحیثه یه آچیلمیش باشقا بیر ایش اولمامیشدیر.آمما بوموثبت تارتیشمالارین کناریندا سایین گونتای بی جاوانشئرین یازیلاری چوخ-چوخ دوشوندوروجوایدیر. گونتای بی ایرلی سورولن طرحی بهانه قرار وئررک داهی اوندر محمدامین رسولزاده نین یاراتدیغی میلی بایراغیمیزین آرخاسیندا بیر ایدولوژیک بوشلوغون اولدوغونو ایدعا ائدرکن میلتیمیزین اوزللیکله گونئی ده کی اکثر اینسانلاریمیزین ایناندیقلاری ایسلام دینی و اونون پئیغمبری حضرت محمد (ص) ها حیقارتلر یاغدیراراق هم مقدس بایراغیمیزی و همده ایرلی سورولن طرحی رد ائتمه یه چالیش میشدیر. بو گون گونئی آذربایجان میلی حرکتی چاغداش بیر جریان اولاراق دونیادا کی حوقوق نورملارینا اویغون لائیک،دئموکراتیک،موستقیل وواحید بیر آذربایجان ددولتی قورماغا جهد گوستریر.بو او دئمکدیر کی گلجکده بویوک میلتیمیز یاراتاجاغی
لائیک،دئموکراتیک و حوقوق دوولتی سایه سینده بوتون ایدولوژیلر و اینانجلار آزاد اولاجاقلار.و ائله بیزیم مقدس آماجلار و آریمانلاریمیزیندا آنلامی،اولولوغو، بویوک لویو و گوزلییی ده بوندان عبارتدیرکی بویوک آتا تورک بونو ایلک اونجه بویوک تورک میلتی و سونرادا بوتون دونیایا ارمغان ائتمیشدیر.
بو گون گونئی آذربایجان میلی حرکتی نین ان حساس دوروموندا و گئچن نئچه ایلده میلی حرکت فعاللاری نین چوخ اینجه لیک وتیتیزلیکله گوستردیکلری آغیر چابالار نتیجه سینده یاواش-یاواش میلتین اکثر کسیملری و طبقه لرینین چوخ احتیاطلی شکیلده قاتیلدیقلاری بیر دووروده،کئچمیش تاریخی تجروبه لری وایندیکی سوسیال وسیاسال دوروموموزو نظره آلمادان میللتین دینی و اینانجینا قارشی سایغی سیزلیق گوسترمک و اونو چوخ ایدعالی و عالیمانه ژئست ایله ایرلی سورمک،غئیر دئموکراتیک،غئیراوصولی،غئیر علمی وغئیر مسئولانه بیر ایشین چوخ اوته سینده میلی حرکتی میات ایله اوز-اوزه قویماقدان عبارتدیر.
اونا گوره کی گونئی آذربایجان میلی حرکتی اوز مقدس هدفلرین واوصوللارین چوخ نئت وآچیق شکیلده اورتایا قویموشدور و او اوزده نده بئله بیرغئیری اوصولی داورانشلارا اصلا یئر وئره بیلمز اینانجیندایام ساده جه میلی فعاللارین دیققه تینی بو موخاطیرلی مسئله یه چکمک نییه تی ایله بو قونویا توخونماق ایسته دیم.
ساغ اولون یاشاسین آذربایجان
یاشاسین آذربایجان میللی آزادلیق حرکاتی
یاشاسین میللی بیرلیگیمیز
درین حورمتله:آراز تورانلی