در جواب توهین خبرگزاری فارس به ملت ترک
آدم نشوی
د. لطیف
آنکس به قلم کند که توهین دگران
ذاتش بشود عیان و مردم نگران
سخت ست لئیمی که کند توبه از آن
ترک مرضی که سخت باشد و گران
در سوریه کشتار تو بینی که بچشم
تصویرت از آن شود همی شیشه و پشم
وحشیگریت کند جهان را که بخشم
تو شیر نه ای که پنبه ای اینهمه رشم
ای دشمن انسان چه گوئی تو جفنگ
خود مظهرجوری و جفا حیله و ننگ
اعلام مکن تو بر جهان نفرت جنگ
گر شیشه عمرت زنی هرلحظه بسنگ
سگ پارس کند چو کاروانی برود
از ترس گهی عو کند و گه بدود
اندرز مریزد که چو گیلاس ز سبد
آدم نشوی تو با چنان خصلت بد
اورمو گؤلو
د. لطیف
گئتمه ای نازلی شتابان سسله ییر دیللر سنی
بیقرار اولموش اوره کلر بکله یر ائللر سنی
آفت نسیان توتوب اولموش یازیق بیر جان اسیر
گوسسه ده بیرگون صبا فریاد ائدر یئللر سنی
بحر توفاندیر بیابان چون قیامت قووزانیب
اژدها تک ایسته ییر اودسون کی بو چؤللر سنی
بیر پناهسیز جانکیمی اولدون اسیر بیگانیه
قان توتارگؤزیاشلاری وصف ائدسه بولبوللرسنی
سئحر ائدردین ماوی گؤزله او باخیشلار عالمی
برزخ ویرانه ده سورماز کی غافیللر سنی
یو خ داها هیجرینده طاقت توتدو بستانلار خزان
ناله لر فریاد ائدر همده کی نیسگیللر سنی
سئوگیسی اغیار الیله اولدو برباد اورمونون
جننتی ویرانه اولموش سسله یر ایللر سنی
نغمه لی باهار
د. لطیف
باغ و چمن خوش بزه نیب گلدی باهارعیشوه لی
جوشقو توتوب گؤر نه سولار داغ دره لر نشئه لی
موسیقی تک یئل نفسی نغمه سالیب ائللره
غنچه قیزیل گول پای اولوب سئوگیلی او تئللره
سارماشیقین عطری یاییلمیش نگؤزل باغلارا
غمزه لیدیر یئل نفسی عیشوه ساچیر داغلارا
لاله و نرگیس ساچینا نازلی گونش گول تاخیر
چشمه اویانمیش یوخودان گؤر نئجه بال تک آخیر
عیش صبا مست ائله ییر گوللری سونبوللری
ذوقا سالیب غنچه عجب نغمه لی بولبوللری
بزم ائله ییر چون گیلاوار عشقه دولوبدور نگؤر
سئوگی بولوب محضر گولده نگؤزل خوش عؤمور
آلچا گول آچمیش دئیه سن گؤزلری حیران ائدیر
شوقا دولوب گؤرنه گونش باغلارا وئرمیش عطیر
یئر گؤیه باخ خوش بزه ییب گؤرنه باهار اؤلکه نی
جنت ائدیب ساکی گولوستان باغی بو بؤلگه نی
چؤلده بنووشه ناز ائدیر گؤر نه اسن یئللره
شوق گؤزللیک ساچیلیب باغ و چمن ائللره
گول سپه لنمیش یاناراق شعله کیمی چؤللره
نغمه لیدیرخوش ساوالان جوشقو دولوب گؤللره
دورنا قاطارلار دوزولوب سس سالاراق گؤیلره
روحو چکیر ماوی بویاق خوش گله رک کؤیلره
پارچالانیب آغ بلوتلار هر تیکه سی بیر یئره
گلدی قارانقوش دییه سن نغمه لری خاطیره
شنلی طبیعت آچیلیب سئوگی قیزیل گولکیمی
ذوق ائله ییر چؤل خوروزو گؤر نئجه بولبول کیمی
هر یئره دولموش عجبا نازلی باهارین سسی
بایرامی خوشدوربو ائلین همده گؤزل نغمه سی
خوش یاییلیب ماوی خزر گؤر نئجه رویالارا
بذل ائله ییر خاطیره سین کؤنلو دولو ماجرا
روح گؤزللیک اویانیب رنگه سالیب کؤشنی
عطر طراوت گؤتوروب باغچا و باغ گولشنی
مستدیر طبیعت ائله بیل فرش خزر اطلسی
سئحر ائله ییر گنج زمرود دییه سن هر کسی
سئوگی خیالیندا صبا قوش کیمی طیران اولوب
بحر گؤزللیک لره اینسان نئجه حیران اولوب
دویغو گؤیرچین اوچاراق گؤیلره خوش سئیر ائدیر
شوقا گلیب گولشنه باخ هر یئری اولموش عبیر
سیّر طبیعت اویادیب غنچه گولو هم قوشو
گول آچاراق مست ائله ییر همده نگؤرسرخوشو
خوش بو طبیعت نگؤزل یاز نفسی مژده لی
نغمه لیدیر باغ و چمن همده نگؤر چشمه لی
تار و کمان بیرده مغنی نئجه خوش سسله نیر
شعر و غزل سئوگی سؤزویله نگؤزل بسله نیر
مجلیس بزم اولدو طبیعت یئنی جنت کیمی
لعل باهار دولدو باغا گؤر نئجه ثروت کیمی
گئتدی خران همده قارانلیق داها بو اؤلکه دن
مئه چکیلیبدیر نگؤزل چیخدی سهند کؤلگه دن
زمزمه دیر گؤر نه حیات شوقا گلیبدیر صبا
عیشرت مستانه اولوبدور هوسی خوشنوا
یاز نفسی موسیقیدیر گؤرنه یاییلمیش سسی
شعله چکیر داغدا نگؤر لاله لرین زیروه سی
نغمه آزادلیق اولوب دیلده عجب خوش غزل
سؤزده و آوازدا گؤزلدیر وطن عشقی ازل
قورتولوشون آرزیلاری همده اویانمیش باهار
کورکولو داغلار اتگینده اریییر بیرده قار
ذوق ائله ییر گؤرنه باهار نغمه لی بیرسازکیمی
شور و صفا جوشدو موقامدا یئنه آواز کیمی
دولدو آزادلیق هوسی گؤر نئجه خوش جانلارا
مارش سحر موژده وئریر قهرمان اینسانلارا
عیشوه لیدیر گؤرنه سحر هر یئری چیچکله ییر
روح طراوت اویانیب اؤلکه ظفر بکله ییر
بولدو طبیعت گینه ده خوش عجبا شوکتین
قوتلا لطیف سئوگی باهاری ائلیمین جننتین
03.2012
سئویملی آنا دلی
د. لطیف
سئوگی دیلیدیرخوش آنا دیل گؤرنه گؤزللیگ
خوشدور عجبا دادلی بو معنا و اؤزللیگ
عشقی آنادان آلدی جوجوق همده کی شنلیگ
او شوق گؤونمک یارادیب اینسانا کیملیگ
بو دیل نگؤزل بال کیمی بالداندا شیریندیر
بیر چشمه فیاض اولاراق گؤر نه دریندیر
ذوق عالمی تک مهر و وفا همده بریندیر
اینسانلار بو روح صفا خوش و عجیندیر
او نشئت جان اینسانا اولموش ائله بیل جان
گوللر بزه گی سانکی باهاردیر بئله بستان
هر کلمه سی معنا اؤزو دور حکمت دیوان
سانگی گول آچیب گوللرایچنده او گولوستان
اینسان کی آچیب دیل آناداندیر او محبت
دریا کیمدیر گؤرنه اؤزللیکله بو ثروت
آمال اوره کدیر او گؤزللیک نئجه قیمت
او شور و صفا بیرده اولوبدور جانا زینت
خوشدورآنا دیل ذوق اوره کلرده بو دویقو
اولموش ازلی مهر و وفا اینسانا جوشقو
دیللرده معمای گؤزللیکله بو قوشقو
اسرارا دؤنوبدور دییه سن کی بئله سورقو
او مهر و محبت چیراغی هدیه جانان
اولموش بشره ریشه هر روح و روان جان
او ثروت دیل مونس جاندیر او گولوستان
تعظیم ائله ییر حؤرمتینه شانینه اینسان
حلقوم سسه گلدی سیتم آلتیندا قالان دیل
باخ قدرتینه اولدو وطن گؤر نئجه بیر سئل
آخ ظولم ائوینه دیل کسنه باغلاما دای بئل
یاندی بوگولوستان توتاراق بیرده خزان یئل
دیللرکسیلیب قان سوزولور قهراولوب اغیار
سندن سنه باشقا داها یوخدور اولا بیر یار
سازلاردا سیزیلدارکی بونو همده نگؤر زار
بیگانه ائدیب دیر دیلیمی گؤر نئجه اینکار
دیل پارچالانیب توتونگؤر اؤلکه بوتون قان
فریادا دؤنوب درد کی اولموش نئجه طغیان
اولماز وطنیمنده دیلیم اولسون منه هیجران
خوشدورآنا دیل اینسا بو روح و روان جان
بو پرچم جان خوش دیلیم اؤلمزکی ائلیم وار
اولموش اگر هم دشمن غدار یوز ایل هار
دیللرچیغیریربایراق اولارکن نئجه نگؤرزار
مین لاله سولوب جانکیمی فریاداولوب جار
ای باد صبا وئر منه پیغام او باهاردان
آغلار وطنه مژده گتیر بیرده نیگاردان
یاد ائله قلم سئوگیلی دیلدن او دیاردان
چیخدی داها صبیریم عجبا بیرده عیاردان
توفانکیمی اس ظولماتا ای دیل ائله تالان
شانلی وطنیم اولدو نگؤر ظولمله ویران
فریاد چکیر ناله کی تاریخ بئله عصیان
یئرگؤی توتاراق تهلوکه همده نئجه طغیان
اسرار طبیعت یارادیب هر دیلی جاندان
باغلی بشرین دویغوسوهم کیملیگی اوندان
هردیل اؤزونه خوش وگؤزلدیرو خورامان
هر کس دیلینه سایقلیدیر همده کی حیران
خوشدور آنا دیل هر کسه بو هدیه جانان
ایسته ردیلینی سئوگیسینی همده هراینسان
یازسنده لطیف خوش آنا دیلده بوگولوستان
ثروت باغیدیراینسانا بودیل و شیرین جان
02.2012
صبح دیاریم
د. لطیف
ای خوش او گونده کی بو شام غریبان بیته جک
خوش گولوم گول چمنیم باغ و باهاریم گله جک
گیلاوار نوش ائده جک عطر گولو سر خوش تک
مست اولوب یاز نفسی عیش و قراریم گله جک
پیک احساس دولوب شهره بوتون زمزمه دیر
گونشین شوقی ساچیب سانکی او یاریم گله جک
مئیی دولدور قدحه ساقی یامان گون قالماز
وئر ایچیم شربت وصلی کی هاواریم گله جک
او توزوب عؤمروم اگر جمله حیاتین اونسوز
مین گؤزللر گؤزلی دار و نداریم گله جک
گئجه قالماز ابدی باخ اوفقا گون دوغولوب
سحرین صبحی ایله بولبول ساریم گله جک
دئییین او واعیظ شهره بیتر آخر غربت
اوره گی مست ائله ین لعل عیاریم گله جک
یوخدور هئچ ظولم ائوینین پایه سی ظالیم ییخیلار
دولت عشقه دایاق صبح دیاریم گله جک
چیرپینیر قلب اگر حسرت و حیرمانه دولوب
سئوینیر یوخسولا باخ ثروت واریم گله جک
خم وصلت عطیری دولدو لطیف باخ جانا
دور گؤزوم موژده گتیر نازلی نیگاریم گله جک
02.2012
اوزاق خیاوان
د. لطیف
گوللرین رنگی قاچیب
یان یانا وئره رک
قیزیل گولون قبری اوستونده
اونداکی دئشتاوار،
قارا چادیر چکیر
گونون پنجره سینه، اوفقلاردا
خزان،
زهر کیمی دایانیب مئه لرین نفسینده
و قوشلار،
ایسکیلت کیمی قورویوبلار خوللاردا
و ایلدیرم ائله بیلکی دونوب
بوز کیمی بولودلاردا
گولوشون جنازه سی،
ائله بیلکی سالانیب مئه لرین ساچیندان
اونون لوت دویغو سو،
هوسلی دوداقلاری
قیامت سالیب،
لاشخورلارین آراسیندا
گونش،
باهار فصلی کؤچوبدور شهردن
و ایضطراب کؤلگه سی،
وحشت سالاراق،
میزیلداییر یئللرده،
سیزقین سیزقین،
دارآی بیداد چؤللرده
بزه ک لی کپنک،
ائله بیلکی قارا چارشاب اؤرته رکن،
گیزله نیب قورخوسوندان
بایقوش سسین دویاراق
خیالین قوینوندا
اوزاقدان بیر قارالتی گلیر
اووجوندا ایشیق
اوره گی قوش کیمی چیرپیناراق
اوندا کی گؤز آغاردیر
یابان ظولمات اونا
سکوتون،
اوجا پنجره سی تؤکولور شاققیلتی یلا
سانکی سحر
گؤزون زیلله یب اوفوقا
صبیرسیز گونش خیالیلا
دئیه سن، وحشی ایتلرین سسی
اوزاق خیاواندان،
گئجه نین آغیرلیقین
اؤلچور بوغاناق
اوندا کی، دان اولدوزو هیجانلا،
داغلارین دالیندان
بویلانیب باخاراق.
01.2012
فریاد
د. لطیف
قلمین سوموگوندن
قان دامیر هله ده
وصف ائده رکن رویالارین
فیکیر آلاراق؛
اؤز جنازه سین چیینینه
داها بیر شئی قالمایب دئمه گه
اوزاق ساحیلده،
گونشین دوغوموندان سونرا
ایندی دای قورخو،
طبیل تک، آلیب شهری باشینا
گؤزلر توتولوب
قولاقلار کار اولوب
نفسلر بوغولوب
ائله بیلکی هر شئین رنگی بیر اولوب
پاییزین، قیشین،
باهارین، یایین
تویون، یاسین،
دوغومون، اؤلومون
ایندی دای، بلند قو اون سسی
ییرتاراق شهرین قولاغینین پرده سین
بوغوبدور گولوشون سسین
ایندی دای گؤزلر، گؤیلره زیلله نرکن
مات قالیب اینسان
یئر، گؤی، و زامان
اونداکی بیر قیزین جسدی،
حامیله حامیله
آسیلیب بانقراتدان، شهر اوستونده
کفن سیز، رسوا کیمی
ائله بیل یئلده بیر سس وار بوغاناق
پاندول کیمی جنازه ایله آخاراق؛
من زیندانا گئتمک ایسته میرم،
یئریم بوردا خوشدور دئیییرم
چیغیریر قارنینداکی اوشاق!
01.2012
گله جک یاز
د. لطیف
اوچ گؤیلره ای عشق باهاریم گله جک یاز
قالماز داها هیجراندا کی او قافله ناز
گؤزلر تیکیلیب یوللارا چون گلسه اگر یار
بیر ثانیه چکمز کی ائدر قلبی سرافراز
دوران باهاری سوراراق صبح ازلدن
او خوش گیلاوار بیرده اولار عشولی طناز
بو قهر زامانی داها چکمز کی اوره کلر
اولماز گونشه بیرده قارانلیق گینه دمساز
هرقافله گؤردومکی گئدیب دؤنمه یب آرتیق
هیجران نفسییله دییه سن ناله چکیر ساز
بیر نغمه اسه ر مژده کیمی یئل نفسینده
گولزار وطن شوقا گلرکن اولار افراز
قالماز داها او آفت دوران بو چمنده
گلسه او گونش بیرده ائدر گؤر نئجه اعجاز
امیده امید باغلا لطیف قالما امیدسیز
اسرار ازلدیر دییه سن کی گینه بو راز
01.2012
تونقال
د. لطیف
آیاقلارین سسی،
آلیب چیگنینه،
خیاوانلارین آغیرلیقین
و آلاهین معشوقه سی،
زینا ائده رک،
اوتوروب مئه لر اوسته،
اؤز قتلینه، فرمان وئره رک
قاچا قاچ، گؤتوروبدور شهری باشینا،
و بیر حامیله خانیم،
بوغولور دوغماق حالیندا،
اضطراب ایچینده
و طفیل، چیخماق ایسته مه ییر،
آنانین قارنیندان چؤله
اونداکی اوشاقین ایاقلاریندان
توتوب چؤله چکیر،
بیر قودوز جاناوار
و ییرتیجی دیشلرینده، نیفرت ایشیللاییر
توزا توز فاجعه،
آرزولارین جنازه سی اوسته دورارکن،
گؤز یاشی اینتیحار ائدیر،
اؤزون آتاراق، اون بئش مرتبه دن
و قورخو تابلوسو ساللانیر
کوچه لرده، میداندا، باخیشلاردان
ایندی باروت مزه سی،
آنبار اولوب، یئلین نفسینده
و وحشت بولوتلاری، شیشرکن،
سالخیم سالخیم،
شهرین خیالیندا
اوندا کی اضطراب نطفه سی،
صف چکیر تونقال تونقال
گؤزلرین قاباقیندا
اوندا کی هارای سسی
بوغولور حلقومدا
جوشقون دویغو کیمی، دامارلاردا!
گؤره سن نه زامان اوچاجاق
گونش قوشلارین قاناتیندا
گؤره سن بنووشه نه زامان آچاجاق
قارلی داغلارین محالیندا؟
12.2011
گلمیر نظره بیرده
د. لطیف
ایللر مین اولوب کئچمیش گلمیر نظره بیرده
هئچ عؤمره وفا قیلمیر نه مسجد و مئیخانه
ای جان هانی جانانین گئتدی مگر او دیلبر
مجنون اولاراق ائتمه سن کندینی آواره
مظلوم زمان اولموش مفلوک نگؤر یانمیش
فریاد ائله ییر هر گون او عاشیق بیچاره
او تخت و مقام قالماز چون ظالیمه غدارا
بولماز داها قدرتده هئچ دردینه بیر چاره
ای مفتی دین گل گؤر مظلوم دوشوب قانا
مین ناله سسی دویدم اولموش کی نه دیوانه
بئش گوندور اگر عؤمرو قالماز بو ظواهیرلر
بول عشق ازل کؤنلوم بیر گؤهر دردانه
آفت وئریلیب عشقه بو شام خراباتدا
آتشده نگؤر یاندی شیدا کیمی پروانه
اود دور اوره گیم ساقی آچ شهد حیات گلسین
بو تشنه کؤنول ایسته ر چوخدان نئچه پیمانه
کیم حکم ائلیب شرٌه غارت ویرا بو دهره
بو باغ و چمن اولموش سانکی بئله ویرانه
هر عامیل بی وجدان مشروع زمان اولموش
اولاد وطن گلیمیش سانکی گؤزه بیگانه
ای جان نقدر دؤزدون بو آتش هیجراندا
دردین چوخالیب اود توت عصیان ائله سین خامه
طوفانه دؤنر بیر گون هیجرانا دوشن سسلر
دای سورما لطیف آرتیق محو اولدو بو کاشانه
21 آذر (قهرمانلارینین خاطیره سیله)
د. لطیف
21 آذر بو گون، اؤلکه ده، گونش نفسیله، یاییلار
21 آذر بو گون، گوللرین دوداقلارین، گولوشله بویار
21 آذر بوگون، لاله لرین خاطیره سینده، اود توتوب یانار
21 آذر بو گون، حسرتلردن آرزیلارا، رنگین کمان قورار
21 آذر بو گون، او تایدان بو تایا، بو تایدان اوتایا، کؤرپو وورار
خاطیره سی ایلدیرم تک، داغلارین زیروه سینده، سس سالار
خزرین اوره گینده، دالغا تک، پارچالانیب جوشار
قوش کیمی قانات چالار، گؤیلرده اوچار
21 آذر، شاعیرین رویاسیندا دویغودور، دوداقلاریندا، قوشقو
قوشلارین قاناتلاریندا شوقدور، اوره کلرینده جوشقو
بو خاطیره، جوجوقلارین گولوش لرینده، گولر
آنا دیل کیمی، قیزلارین دوداقلاریندا، سوزر
یازدا، سئوینج اولار، دورنالارلا قاتارقاتار، گلر
پاییزدا، یارپاقلاری، ثانیه تک، خول بوداقدان توکولر
او حسرت بو گون، اوره کلرده چیرپینار، بکلر
او خاطیره بوگون، اوشاقلارین تمنا گؤزیله، باخار
او غصه بوگون، آنالارین اوره گینده، سئل کیمی، آخار
21 آذر، گیلاوارین نفسینده سانکی، مست اولار
یئللرده، توفان کیمی، قوپار
گدیکده قیشدا، بوران کیمی اسر
گئجه لر، فنار تک ، ظولماتی کسر
بو گون، داغدا داشدا، ده ده قورقودون سازیندا، سسله نر
هجوم کیمی، قارا قاشقانین ترکینده، چاپار
اوخاطیره، تبریزین میدانیندا، کتابلارلا، تونقال تونقال یانار
قه فیل گولـله لرله، فدائی تک، قانینا بویانار
ظولماتین اوخی لا ، وورولار، کسیلر، دوغرانار
21 آذربوگون، دارآغاجیندا بوینون، دوز توتار
ستارخانین تفنگین، چیگینینه سالار
بابکین قالاسندا، کلیبرده، داغ اوستونده، دورار
بوگون اؤلکه نین، تاریخین زیروه سینده، ثبت اولار
یازدا، بنوشه تک قوشا داغدا، آچار
قیشدا لاله تک، سهندین قاریلا سولار
21 آذر بو گون ، لوت جنازه کیمی، ماشین دالیندا، سورونر
اردبیلین خیاوانلاریندا، کوچه لرینده، گؤرونر
او قانلی هیکل، توزا، تورپاغا، بؤهتانا، بورونر
21 آذر بوگون اؤلکه ده، زیندانلارا دوشه ر
اعدام صفینده، گؤزو آچیق گوله له نر
ظولمات گئجه ده، دار آغاجیندان آسیلار
گونش تک اؤلکه یه ، شفق ساچار
یئکان کیمی، یئل قاناتلی دالغالاردا چاپار
شعله تک، ایلدیرم اوره گینده، آخار
21 آذر، مضراب کیمی، اوره ک سازین، یارالار
حسرتدن، آیریلیقدان، سؤز سالار
گؤزلردن، یاشکیمی سوزر
دوداقلاردا، سکوت کیمی دؤزر
21 آذربوگون، صفرخان لا، زیندانلاری گزر
صمدله، اوزاق کنده کیتاب گؤتورر
فریدون کیمی، دار آغاجینا گولر
لاله تک قانیلا، داغلارین اتگین بزه ر
جوشقون دالغا کیمی، سسله نر توفانلی خزر
21 آذر بوگون، سینیق کؤرپوتک، آراز اوسته قورولار
آیریلیق دردین، اوتای بوتایدان سورار
شعرلرده ، گؤز یاشیلا، آخار
سارای لا، آرپا چایندا، بوغولار
سازلاردا، غصه ایله اوخونار
داستاندا، حسرتله دوغولار
21 آذر بو گون ، آرزولاردا، سسله نر
ماهنیلاردا، دیللرده، بسله نر
گئجه نین کولگینده، ایشق سالار
سحرچاغی، گونشدن ایلهام آلار
او بیر آرزو دور، آنالارین اوره گینده
بؤیوک بیر یوکدور، تاریخین کوره گینده
آزادلیق هوسی، خلقین دیلگینده
قورتولوش سسیدیر، اؤلکه نین امکینده
21 آذر بو گون، کیملیگین، اؤزو دور
ائلین، اوبانین، اؤلکه نین، سؤزو دور
عشقین، اینامین، عدالتین، گؤزودور
بو گون، خلقه بیر آماجدیر، آنا دیلین تملی
اینسان حقیدیر، عدالتین عملی
21 آذر بو گون، اؤلکه ده، بیرهارای دیر، ائللرده
21 آذر بو گون، بیر یارالی اوره کدیر،ایللرده
21 آذر بوگون، بؤیوک بیر نفس دیر، سئللرده
21 آذر بو گون، اؤلکه وطن دیر، دیللرده
21 آذر، دامارلاردان سوزولن قان
خزاندا، کسیلن جاندیر، غملی زامان
دسته دسته، آسیلان اینسان
بو گون، ایلک باهاردا قانلی خزان
بوغولموش نفسدیر، اسیربیر جان
بو گون، گولوستان کدردیر، آغیربیر دومان
21 آذر، اوره کلرده، یارالی بیر نیسگیل
سولموش آرزیدیر، قیزیل گولون اوره گینده زیگیل
بو خاطیره لرده، دوران، همده جنایت گئجه لر
سوالسیز دئگیل، جاواب سیز نئجه لر
21 آذر، فغاندیر، حلقومون چیغیران سسی
21 آذر، بوغونتی دیر، خلقین توتولموش نفسی
بوگون، قارانلیقدا آخار، ایلدیریم بایراغی
بوگون ییخیلیب، مظلومون اومود چیراغی
بوگون اؤلکه ده، توفاندا بسله نیب، بیر سکوت
بوگون، شفقله حامیله دیر، قارا بیر بولوت
21 آذر، وطن سئوگی سیدیر، ائلین ماراقی
بو گون، آزادلیق هارایدیر، آنا دیلین بایراقی
"نیگارین" کدری دیر، ائلین حسرتی
"هجرین" دئوریمیدیر، گؤزون حیرتی
بوگون، کؤراوغلونون، داستانی دیر، چنلی بئل
بو گون نبی نین، ایفتیخاریدیر تاریخه سیغیمایان، شانلی ائل
21 آذربو گون ، قهرمانلارین سسیدیر، ایتگین مزاری
اؤلکه نین حسرتیدیر، دردی قراری
بؤلگه نین صبری دیر، آه و زاری
تاریخین اضطرابی، قانلی کؤینگی
عصیرین داوامیدیر، جانلی اؤرنگی
21 آذر بو گون تالاندیر، آمانسیز بیر زامان
مغان چؤلونده ، یاییلمیش بیر دومان
اوره کلرده قورخو، دیللرده فریاد و فغان
بوگون اؤلکه، سکوتون، فریاد سسیدیر
بوگون اؤلکه، خلقین، جوشموش نفسیدیر
21 آذر بوگون، اوشاقلارین دیللرینده، سانجیلان تییغ
آنالارین گؤزلرینده غمدیر، دوداقلاریندا قییغ
آغلار گؤزلرده وحشتدیر، حلقومدا، بوغولموش چیغیریغ
بوگون، یاییلیب توفاندا بیرآغیر سکوت
بو گون، یئر گوی قاندیر، اؤلکه توت ها توت
21 آذربوگون، باهارین سسیدیر، سازلاردا چالینار
21 آذر بوگون، آزادلیق نغمه سیدیر، دیللرده اوخونار
ازلدن آزادلیق هوسی، اوره کلرده یاشانار
21 آذر بو گون، موتاللی تپه لرینده، دیری دیری اینسانلارلا، یانار
21 آذر بو گون، غدار گئجه نین اوره گینه، قورخو سالار
21 آذر بو گون، ظولمات لشکرین ایچینده، اود قالار
21 آذر بو گون، گؤزلردن، قان کیمی، سو یئرینه آخار
21 آذر خاطیره سینده، یاشایارلار، ایگید قهرمانلار
21 آذر بوگون، شرف گونو دور، بو اؤلکه ده
21 آذربو گون، آماج گونو دور، بو بؤلگه ده
21 آذر بو گون، خاطیره دیر، ظولمه عصیان
21 آذر بو گون، بیر حادثه دیر، ریشه لی قوجامان
21 آذر بوگون، باش قووزایب یارالی وطن طغیان
21 آذر بو گون، ایاقدا دیر، گینه ده قوجا قهرمان
21 آذربو گون، بیرلیگ سسیدیر، اؤلکه نی اویادان
بو گون، صف چکیبلر آنالار، آتالار، یاشلی، جاوان
بو گون، قول قولادیر گینه ده، آذربایجان
بو گوج آخاجاق، سئل کیمی، اودلو ساوالان
ییخاچاق ظولماتی، آغیر ولکان.
1390
غزل
د. لطیف
آتمیشام ادیانی گئتمیش روضه ریضوان کیمی
درگه مئیخانه ده عشقه ستایش ائله رم
بس یالان دویدوم خورافاتدان جهالتدن بوتون
بحر عشقین مکتبینده کسب دانش ائله رم
گؤرمدیم صدق و صفا عمامه ده منبرده چون
محفل جانان دا چوخدان دیر نیایش ائله رم
ای مسلمانلار ندیر مین بئش یوزایلدیر بو عزا
آنلادین دونیادا بیلسین بیرده خاهیش ائله رم
سؤیله دیم واعیظ یالانلا آچما دای ایللر بازار
سؤیله دی ظن ائتمه کی ترک نومایش ائله رم
سؤیله دیم مین ایلده سورسه وعده جننت اگر
یوخسا ظن ائتمه جهالتله کی سازیش ائله رم
ریند اولارکن آتمیشام تقلیدی هم سجاده نی
سئوگیی ایماندیر منه آزاد یاشایش ائله رم
محضرجانان اولوب درس وفا حکمت لطیف
دستماز عشقی آل مئیله سفاریش ائله رم
کانتن
د. لطیف
نه قدر سوسماق اولار، اسارتین پاسلی زنجیرلرینه؟
نه قدر سوساماق اولا، اسارتین توهینلی قفس دمیرلرینه؟
نه قدر سوسماق اولار، قساوتین وحشی اجیر لرینه؟
نه قدر سوسماق اولا، جهالتین خشونت عمللرینه؟
نه قدر سوسماق اولار، جنایتین قان ایچن تمللرینه؟
نه زاماناجان گولـله لرین ویزیلتی سی، قولاقلاری آپاراجاق؟
نه زاماناجان هجوم قورخوسو، کوچه لرده، شهرده، قالاجاق؟
نه زاماناجان قارالتی وحشتلر، میلچک کیمی هر یئره قوناجاقلار؟
نه زاماناجان اؤلکه نین، دامارلاریندان قان سوموراجاقلار؟
نه قدر دؤزمک اولار، اپریمیش جللادلارین کئف چکمک لرینه؟
نه قدر دؤز مک اولار، جنایت اللرین قان تؤتمک لرینه؟
نه قدر دؤزمک اولار، اؤلکه ده ظولماتین آغیر دیره ک لرینه؟
نه زامان دویاجاقلار، اؤلکیه قورخو سالانلار، فریاد و ناله سسین؟
اوشاقلارین قورخوسون،آنالارین آغلار بوغولموش نفسین؟
او قیزلارین، او جاوانلارین، او قانلی جنازه لرین کیمدیر قاتیلی؟
او جسارت، او جنایت، او مصیبت لرین کیمدیر عامیلی؟
آی ائولره حمله ائله ین لر
آی شهری قفسه دؤنده رن لر
آی یازیقی گولـله له ین لر
آی اؤلکه نی جهنم ائده ن لر
آی مللته زور دییه ن لر
صاباح کیم جاواب وئره جک، او ظولمات اولایلارا، نئجه لره
تؤکولسه عصیان سسی مینلرجه اگر، خیاوانا، کوچه لره؟
ندیراو بربریت، قتله فرمان وئرمک؟
میداندا، کوچه لرده اینسانی داشقالاق ائله مک؟
دیللری کسمک، آغیزلاری تیکمک؟
اینسانی قفسده، باشی اوسته ساللاماق؟
مظلومون اوستونه، سیلاحلا جومماق؟
سنده یاشاییرسان، بو یئرلرده
سنده قالیرسان، بو شهرده
سنده ایچیرسن، بو سولاردان،
سنده کئچیرسن، بو یوللاردان،
آی اینسانا دوشمان اولان!
آی اؤلکه نی ویران قویان!
مگر باغلی دئگیلمیسن بو یئره، سنده،
بو ائله ، بو دیله، بو اؤلکیه، بیرده؟
هانسی آللاهین رذالتی دیر، او جنایت؟
هانسی دینین اسارتی دیر، او خیانت؟
هر اینسانین حقی وار،آیاقین اوزاتماقا
هر اینسانین حقی وار نفس آلماقا
هر اینسانین حقی وار یاتماقا
هر اینسانین حقی وار اوتورماقا
زیندان دادا اولسا
ایران دادا اولسا
او کانتن، ساواش اعلانی دیر شهره، اینسانا
او کانتن ، بؤیوک بیر اهانت دیر، قانونا
قادینا، اوشاقا، قوجایا، جاوانا
اؤلکیه، بؤلگیه، یوردا، دیوانا، هر یانا
او جنایت ندیر کی چیغیریر، شهرین باشینا
اؤلدورور، داغیدیر، قیریر، توتور، بوغور،
اینسانی دسته دسته آسیر، کسیر، اؤز باشینا؟
صاباح کیم جواب وئره جک، گوناهسیزلارا، نه زامان؟
سحرین قافله سی یاتسا ظولماتدا اگر، اولسا خزان؟
قالسا اگر شفق دومانلاردا، اوره کلر توتارکن قان؟
قالخماسا سسلر اگر خیاواندا، آسفالتدان، ایاقلاردان؟
ییخماسا ظولماتین دیوارلارین همده، آغیر ولکان؟
نه زاماناجان سیلاح سیخاچاقلار کرکسلر، اینسانلارین قولاغینا؟
نه زاماناجان جاوانی، قادینی، قوجانی بله یه جکر کوچه لرده قانینا؟
اینسان مگر قوشدور، سالینیب قفسه؟
قفسدن قفسه، نفسدن نفسه؟
قوشدا بولماییر قفسده کندین خوش
قانات چکمک ایسته ییرگؤیده هر قوش
او کانتن داها، اسارت دیر، اؤلکیه، خالقا
او کانتن داها، اهانت دیر، تبریزین آدینا
او کانتن، بؤیوک بیر وحشیلیک،
او کانتن بربریت دیر، 2500 ایللیک،
او کانتن قساوتدیر، بؤیوک بیر رذیللیک
اینسانین وارلیقینا، اینسانین حالینا، اینسانین جانینا
او کانتن، آمانسیز قتلگاه،
او کانتن، بؤیوک بیر جنایت،
او کانتن قفسدیر، بؤیوک نفرت،
او کانتن، یئنی بیر کهریزک،
او کانتن، سانکی بیر توپورجک دیر، شهرین آلینیندا،
آللاه آدیلا !
ایمام آدیلا!
ایسلام آدیلا!