آمستردام توپلانتیسینی ده یرلندیرمه
اومود ايلقارلي
گونئی آذربایجان میللی حرکتی ایچینده اولان صنعی (یاپای) آیریلیقلارا سون وئریب، میللتچیلر آراسیندا بیرلیک یاراتماق چوخلو وطن سئور انسانیمیزین آرزوسودور. بو آرزونو گئرچکلشدیرمک اوچون ایچری ده و دیشاریدا زامان زامان آددیملار آتیلمیشدیر. بیرلیک یاراتماق شعاری آلتیندا بیرسیرالاری باشقا هدفلر (اره کلر) داشیسادا ، اصلینده ائله بو بیرلییین ده یر سویه سینده ایرلی سورولمه سی مثبت دیر(اولوملودور). دوغرودان دا میللی قازانجلاریمیز دوغال اولاراق میللی بیرلییی یاراتمالیدیر. بیرلیک اماجی آدی ایله آتیلان آددیملارین بیری ده کئچن آیلاردا هلندین آمستردام شهرینده 21 آذر گونو گئرچکلشن دیالوق (سؤیلشیم) توپلانتسی ییدیر.
بو توپلانتی دان اؤنجه و سونرا توپلانتی نین اصیل آماجلاری کیملرین، هانسی هدفلر اوچون بو توپلانتی نی قورماسی و اونون میللی حرکته گتیره جه یی و گتیردییی سونوج لار حاقدا چئشیتلی شایعه (سؤیلنتیلر)، دانیشیقلار و یازیلار اولدو. بیر سیرالاری بو توپلانتینی میللی حرکتین دیشاری قولونون بیرلشمه سی کیمی ده یرلندیردی، بیر سیرالاری بو توپلانتی نین قورولماسیندا آمئریکانین اؤنملی رول داشیدیغینی و قوزئی آذربایجان حاکمیتینین ده اوندان یارارلانماسینی ایرلی سوردو، کیمی لری توپلانتینی تبریک ائدیب، اونون اوغورلو الینماسین آرزولادی. کیمی لری ایسه اوزده تبریک مساژی یاریب، دالدادا اونون آماجلاریندان واهمه یه دوشوب، باشقا ایشلر چئویردیلر، کیمی لری بو توپلانتینی میللی حرکتین یاشیل لار قاباغیندا بیرلشه رک ، یئنی بیر اویونجو اولاراق مئیدانا گلمه سینی دوشوندو و باشقالاری بو توپلانتی نی آمئریکانین ایسته یی ایله یاشیل لارا و ایران اوپوزسیونونا قوشولماق اوچون بیرینجی آددیم کیمی ده یرلندیردیلر و بوندان قورخاراق "میللی حرکت مستقل حرکت ائتمه لیدیر" دئیه بیانات (بیلدیرگه) یازیب ایمضالاتدیلار و ...
بو تپکیلر میللی حرکت ایچینده اولان تپکیلریدیر. ایران ایسلام حاکمیتینین گیزلی ، اؤرتولو و آچیق تپکیلرین و ائیلم لرین ( عمل) ایسه گؤرمک و دویماق اولوردو. توپلانتی یا ماراق گؤسترنلر ایچینده دئمک اولار کی ایران ایسلام حاکمیتی کسین اولاراق پریشان (تدیرگین) اولموشدور، سئوینمه میشدیر و اونون مثبت آلینماماسینا ایشلر یاپماغا چالیشمیشدیر. باشقا ماراقلیلارین گئرچک تپکیلری حاقدا کسین بیر سوؤز دئمک اولماز، سانیرام.
بو گون توپلانتینین قورولماسیندان بیر سوره کئچیب، بو سوره ده سئویننلر کئفلرین سوروب، بو اوغورون دادین چیخاریبلار. دؤیوننلر و اوزولنلر ایسه ایندییه دک بو حاقدا اورک آجیلارین بوشالدیبلار، سانیرام. بو دویغوسال سوره دن سونرا ، بیر وطنداش اولاراق میللی قازانجلاریمیز آچیسیندان بو توپلانتینی ده یرلندیرمه یی اؤز گؤره ویم بیلیب، باجاردیغیم قدر اؤزتجه یازیب، میللتیمیزه سونماغی دوشوندوم.
گونئی ده اولدوغوم اوچون و باشقا یوردداشلاریمیز کیمی دیشاریداکی اولایلارا اوزاقدان باخدیغیم اوچون ، یالنیز توپلانتی نین گؤرونن یانلارینی ده یرلندیرمک قراریندایام. پرده آرخاسی گئدن فیکیرلر، آنلاشمالار و ... حاقدا یاییلان شایعه لر (سؤیلنتیلر) حاقدا قضاوت ائتمک (یارقیلاماق) بیزه دوشمز ، سانیرام. بو سؤیلنتیلرین دوغرو و یا یالان اولماسین گلجک گؤسترجک و میللتیمیز او حاقدا قضاوت ائدجک.
توپلانتینین اولوملو (مثبت) یؤنلری و سونوجلاری:
هر نه دن اؤنجه دیشاریداکی صنعی (یاپای) آیریلیقلارا گؤز یوموب، بیر آرایا گلیب، یالنیز دانیشماق بئله ده یرلی اولایدیر. دیالوق (سؤیلشیم) آدینی بو توپلانتینین آماجی اولاراق ایرلی سورولمه سی گؤزل بیر آددیم ایدیر. بو گلجک اوچون عنعنه یه (گلنک) چئوریلمه لیدیر. میللتچیلر صنعی آیریلیقلارا باخمایاراق هامیسی بیر جبهه ده دیرلر. قطعی دوشمنلر دانیشیق اوچون بیر ماسا آرخاسیندا بیر آرایا گله بیلدییی حالدا، اورتاق هدف داشییان اینسانلارین بیر آرایا گلیب دانیشمالاری ، هر زامان مومکوندور و بو چوخ چوخ ده یرلی بیر آددیم دیر.
توپلانتی نین قطعنامه سینده (کسمتینده) گئدن ایکینجی مادده یه گؤره قاتیلان اویه لر گونئی آذربایجان دا میللی دؤولت قورماغی میللی آزادلیق حرکتی نین آمالی حساب ائدیرلر و وورقولاییرلار کی آذربایجان میللتی اؤز مقدراتینی تعیین ائتمکده سون سؤز صاحیبی دیر. بللی کیمسه نی و اؤرگوتو وورماق و گؤزدن سالماق آماجی ایله استقلال-فدرال تارتیشماسینی قیزیشدیران بیر سیرالارینین ، سونوندا بو تارتیشمایا سون قویمالاری ماراقلی، اولوملو و موبارک بیر اولایدیر. گاموح اؤرگوتونه "آچیقجا استقلال یا فدرالچی اولدوغونوزو بیلدیرین" دئینلرین سونوندا "آذربایجانین گلجه یینی تعیین ائتمکده آذربایجان میللتی سون سؤز صاحیبی اولمالیدیر" منطیقینه گلمه لری منجه ده یرلی بیر اولایدیر. سایین دوقتور چؤهرقانلی بی دئدییی کیمی "میللتیمیز نه دئسه همن اولاجاق" بیزیم سون قراریمیزدیر و بو قرارا آمستردام توپلانتیسینین اویه لرینین ده گلمه لری سئویندیریجی دیر.
توپلانتی سونوندا گئنل قطعنامه دن باشقا ، قاراباغ و قادین حقوق لاری اوزره اؤزل بیر بیاناتین اولماسی دا ماراقلی و گؤزل بیر حرکتی دیر. بو ایکی قونو حاقدا آیریجا بیانات وئریلمه سی گؤستریر کی ، توپلانانلار آراسیندا بو قونولار اوزره ان کیچیک اختلاف بئله یوخدور. تارتیشیلماز قونولاریمیز سویه سینده دیر بو ایکی قونو. آچیقجا فدرالیزمی ساوونان اؤرگوتلریمیزین ده قارا باغ حاقدا بیاناتین آلتینی امضالامالاری گؤستریر کی بو انسان لاریمیز میللی حقوقوموزو ایران ایچینده چؤزمک ایسته سه لرده، قاراباغ و گئنل اولاراق قوزئی آذربایجانی اؤز وطنلری بیلیرلر. وطنین اوتای بوتایی اولماز. بو انسانلارین بو گون وطنین گونئیی ایله داها آرتیق ماراقلانمالاری قوزئیی اونوتماق آنلامیندا دئییل. هابئله قطعنامه نین 5-جی مادده سینده "آذربایجان میللی حرکتی بوتون ساحه لرده قادین کیشی حقوق برابرلییی یولوندا مبارزه آپاریر" دئییلیب. بو مادده قادین حقوقونون داها آرتیق اؤنمینی گؤستریر، بئله کی تکجه گلجک آذربایجان دا قادین کیشی حقوق برابرلییینین تأمین ائدیلمه سی حاقدا سؤز وئریلمیر، همده بو برابرلیییی تأمین ائتمک بوگونکو موبارزه میزین اساس آماجلاریندان دیر.
قطعنامه ده گئدن باشقا اؤنملی مساله کورد سورونونا باخیش دیر. سون ایللرده بیر سیرالاری بیله رک، و بیر سیرالاری بیلمه دن کورد سورونون نورمال دیشی بیچیمده ایرلی سورموشدولر. کوردلرله بیزیم گلجکده، منافع چلیشکیمیز (تضاد ) اولاجاق. آنجاق بوگون کوردلری و بیزی ده اسارتده ساخلایان اساس دوشمنین مزدورلارینی کوردلره ترجیح اوتمه میز ، نورمال گؤرونمه ین اولایدیر. کوردلرله ساواشدا فارس حاکمیتینین هلاک اولموش مزدورلارینی شهید آدلاندیرماق ، بیزیم حرکتیمیزه یاراشمایان اولقودور (پدیده). بو پدیده نی بیر سیرا رسانه لریمیزده (یئتیرگنلریمیزده) قیزیشدیریردیلار. بیز کورد تهلوکه سی ایله باغلی میللتیمیزی آییق سالمالی ییق، آنجاق بو او دئمک دئییل کی اساس دوشمنی بوراخیب ، اسارتده اولان کورد میللتینه قارشی ایندیدن ساواش اعلان ائدک. "کوردلرین قویروقلاریندان یاپیشیب، سلیمانیه یه آتاریق" دئین بیرسیرا قارداشلاریمیزین، سونوندا گئرچک چیلییه گلمه لری ده یرلیدیر. بو قطعنامه ده کوردلر یوخ ، ایران ایسلام فاشیست حاکمیتی گؤستریلیب و بو حاکمیتین چیرکین نیتلرله آذربایجاندا دئموقرافیک یاپینی (ساختاری) دییشدیرمه سیاستینه قارشی اولدوقلارین بیلدیررکن، رژیمه قارشی میللی ظولم آلتیندا یاشایان باشقا میللتلرله ایش بیرلییی آپارماق ایسته دیکلرینی دئییبلر. طبیعی کی بو میللتلرین بیری ده کورد میللتی دیر. بو قرار چوخ سایلی قروپلارین وریندن بیر آرادا وئریلدییی اوچون میللی حرکتده بیر گلیشمه ساییلیر.
توپلانتی قطعنامه سینین باشقا بیر اؤنملی یئری میللی حرکتین دیش قولونون گؤرولری حاقدادیر. توپلانتی سیراسیندا بیر سیرالاری بو ییغینجاغی میللی پارلامئنته اوخشاتسالاردا !! سونوندا دیش قولون گئرچک رولو حاقدا قرارا گلمه لری مثبت آددیم دیر. دیش قول ایچری ده گئدن حرکاتا یالنیز دستک اولمالیدیر، اونا لابی چیلیک ائتمه لیدیر و سسین دونیایا یایمالیدیر. دیش قولون میللی حرکتین ایچری قولونا خط وئرمک صلاحیتینده دئییل. بو دوشونجه یه توپلانتی اویه لرینین قول چکمه لری ، قارشیلیقلی گوون ساغلایاجاق بیر اولایدیر.
توپلانتینین ان ارنملی و حقوقی سیاسی باخیمدان ده یرلی یؤنلریندن بیری ده یالنیز گونئی آذربایجانلیلاردان اولوشماسیدیر. حقوقی سیاسی گئرچکلری گؤرکزدن گلیب، بوتؤو آذربایجان دئییب دوران بیر سیرا قارداشلاریمیزین سونوندا بو گئرچه ییی قبول ائتمه لری رئالیسمه دوغرو بیر آددیم دیر. گاموح اؤرگوتونو دؤنه دؤنه "سیز قوزئی لیلری تشکیلاتا قبول ائتمه مکله، گونئیی قوزئی دن آییریسیز" دئین بیر سیرا میللتچیلرین بو یئره گلیب چاتمالارینی آلقیشلاماق گرکدیر. بوتؤو آذربایجان اولکوسونه ان اویغون استراتژینی بللی مقصدلرله دییشن بیر سیرا فعاللار بو گون بوتؤولوکدن اؤنجه گونئی ده بیر میللی دؤولت قورولماسی گرکلییینی باشا دوشمه سی سئویندیریجی دیر. میللی اؤندر "ائلچی بی"ین "میللتلشمه، دؤولتلشمه و بوتؤولشمه" استراتژیاسی بوتؤولویوموزه گئدجک ان اویغون و ان کسه یولدور. ایده آلیسم و رئالیزمی اؤزونده بیرلشدیرن بو استراتژییانی ایقولاماق بوتؤو آذربایجانا اینانان هر بیر اولکوجونون گؤره ویدیر.
توپلانتی قطعنامه سی نین باشقا ده یرلی یئرلری ده وار و وورقولادیقلاریم ان اؤنملی بیلدیکلریمدیر. سکولاریزم، دئموکراسی، پلورالیزم و میللی حرکتین مستقیل لییی و ... هامی سینین اوزه رینده آچیقلامالار اولابیلر و بو اساس دا بیر سیرا دوشونورلریمیز یازمیش و دانیشمیشلار.
توپلانتینین اولومسوز (منفی) یؤنلری و سونوجلاری
توپلانتی دان چیخان قطعنامه نین گیریشینده ، توپلانتی نین تاریخی بیر اولای اولدوغونو دولاییجا وورقولاماق اوچون ، میللی حرکتین قاباقجالار یاپدیغی بیر سیرا اولایلاین آدی چکیلیر. "داها اؤنجه آذربایجان میللی حرکاتی 19 اردیبهشت آذربایجان اؤیرنجی حرکاتی (1374)، دانیشیر آذربایجان 1384 و تبریزده قبول اولونان بیرینجی آنادیلی قورولتایی نین قطعنامه سی 1384، بابک قالاسی یوروشلری، بیر خورداد میللی قیامی کیمی 1385 اؤنملی تاریخی درین لییی اولان اولایلاری مئیدانا گتیرمیشدیر". گؤروندویو کیمی میللی حرکتین یاپدیقلاری ایچینده بیر سیرا اولایلارین آدین چکه رک، اونلاری اؤنملی تاریخی درین لییی اولان اولای لار کیمی ده یرلندیریبلر. چوخ ماراقلی و شاشیرتیجی دیر کی میللی حرکتین گلیشمه سینده چوخ اؤنملی، درین و تاریخی اولایلار و دؤنوش نوقطه سی ساییلان ائیلملر بورادا قلمدن سالینیب و یا گؤرمزدن گلینیب. قطعنامه دن وورقولانان اولایلارین چوخوندان قات قات آرتیق ده یره مالیک اولان، قات-قات آرتیق ائتگیلی و درین اولان و دؤنوش نوقطه سی ساییلان بو اولایلاری گؤرمه مزلیک و یا بیله رکدن قلم دن سالماق نه یی گؤستریر؟!! ان خوش گؤرولوکده دئمک اولار کی بو قطعنامه نی حاضیرلایانلار گونئی آذربایجان میللی حرکاتی نین ایندی یه دک یاشادیغی سوره جدن خبرسیزدیلر و یا یئنه ده خوش گؤرولوکله باخساق دئمک اولار کی بو انسانلار سیاسی –اجتماعی حادثه لرین اهمیتی حاقدا بیلگی سیزدیرلر و اؤنجه لیکلری سئچه بیلمیرلر. بلکه ده امضالایان سویداشلار گیریشی اوخومادان اونا قول چکیبلر یوخسا بو اولایلارین بیر سیراسیندان قات قات اؤنملی اولان اولایلاری قلم دن سالینماسینا کسین اعتراض اولمالییدیر.
ائرمنی تجاوزکارلیغینا قارشی تهران و تبریزده اولان اعتراضی حرکت 1374، پروفسور ذهتابی نین تاریخ کتابلارینین ایشیق اوزو گؤرمه سی، دوقتور چؤهره قانلی نین 75-1374 ایللرده سئچکیلره قاتیلماسی و چؤهرقانلی حرکاتینین یارانماسی و میللی حرکتین کوتلوی لشمه سینین باشلانماسی، آذربایجانلی اؤیرنجی لر توپلومونون (مجمع دانشجویان آذربایجانی) تهراندا یارانماسی 1377 ، دونیا آذربایجانلیلاری کنگره سی نین آمئریکادا یارانماسی 1997، بوتؤو آذربایجان بیرلییینین (باب) ائلچی بی طرفیندن قورولماسی، دوقتور چؤهرقانلی نین 1378-جی ایلده، تبریز دوستاغیندا 68 گون آجلیق آکسیاسی کئچیرمه سی (اعتصاب غذا) و بیرلشمیش میللتلر تشکیلاتی نین صدری کوفی عنانین دا بو مساله یه مداخله ائتمه سی، آذربایجان اؤیرنجی درگیلرینین فستیوالی –تهران 1380، چؤهره قانلی نین آوروپایا چیخماسی و چوخ سایلی رسمی و غیررسمی گؤروشلری 1380، 21 آذر گونون آچیقجا شبسترده قید اولونماسی و 300-ه یاخین میللی فعالین توتوقلانماسی 1381 ، آذربایجان سیاسی محبوسلارین مدافعه کمیته سی نین آچیقجا ایچریده یارانماسی 1381، میللی حرکته بایراق سونولماسی و بابک قالاسیندا دوشمن قارشیسیندا آچیقجا میللتچیلر طرفیندن دالغلانیب اونایلانماسی 1382، گوناذ تی.وی نین آچیلماسی و اونون حرکتده اولان ائتکیلری 1384، گونئی آذربایجان میللتینین دؤولتسیز میللتلر تشکیلاتینا عضو اولونماسی (یو.ان.پی.او) 1385، و ... کیمی اولایلارین هئچ بیری نین اؤنمی آدی چکیلن اولایلاردان او جمله دن آمستردام توپلانتی سیندان آز دئییل. بئله اولایلاری اؤزل ندن لره گؤره اؤنمسه مه مک آذربایجان میللتینه و بو اولایلاردا رول داشییان میللی فعاللارا سایغیسیزلیقدیر.
ایکینجی اؤنملی مساله قطعنامه نین بیرینجی مادده سی دیر. نورمال دیشی گؤرونن بو مساله یه توپلانتییا قاتیلانلار ندن اعتراض ائتمه ییبلر گؤره سن!
بیر قورومون ایستکلرینی یانسیدان قطعنامه نین بیرینجی بندی او قورومون دوشمنی حاقدا گئدیب!! قوروم اؤزون تانیتمادان، اؤز اساس ایستکلرینی اورتایا قویمادان، دوشمنینین کیم اولدوغونو آچیقلاییر!! بو مادده نین بیرینجی بند ده یئرلشمه سینین ان ایلکین ائتگی سی ، او قورومون وارلیغینین سلبی ماهیت داشیماسی دیر. سلبی ماهیت داشییان بیر قورومون عومرو آز اولار. هر آن داغیلا بیلر.
کسین اولاراق بیرینجی مادده ده قید اولدوغو کیمی گونئی آذربایجان میللی حرکتینین قارشیسینداکی اساس مانعه (باداق) ایران ایسلم حاکمییتی دیر. شخصیم اولاراق میللی حرکتین هامیسینین بو قرارا گلمه سینی آرزولاییرام و توپلانتییا قاتیلانلارین بو قرارا گلمه سینه سئوینیرم. کاش دیش قول و ایچ قولون هامیسی بیرگون اصیل دوشمنیمیزین کیم اولدوغو حاقدا چاش باشلیقدان چیخا. آنجاق قطعنامه نین بیرینجی مادده سینده ایران اسلام جمهوریتینین دوشمن اولاراق یئرلشمه سی میللی حرکت ایچینده یاییلان بیر سیرا شایعه لره داها آرتیق مئیدان یارادیر. "آمریکالیلار بیر سیرالارین الی ایله (فدرال دموکراتلار و گوناذ تی.وی) میللی حرکتی ایران اوپوزسیونونا –یاشیل حرکته قوشماق ایسته ییر و آمستردام توپلانتیسی بونون باشلانقیجی ییدیر" کیمی شایعه لرین بیر سیرالاری طرفیندن اینانیلماسیندا بو مادده نین بیرینجی بنده یئرلشمه سی و داها سونرا گوناذ تی.وی ده دؤنه دؤنه بیرینجی مادده اوستونده مانور وئریلمه سی ائتکیلی اولوب. اومورام گوناذ تی.وی سوروملولاری تئزلیکله بو مساله نین اؤنمینه واریب و داورانیشلاریندا دیققتلی اولسونلار.
میللی حرکتیمیز ایچینده بیر سیرالارینین عنادلا داورانماسی و بیر سیرالارینین کور رادیکالیزمه دایانیب "بوتؤو آذربایجانین بیر بایراغی وار و ایکینجی بایراق وطنی پارچالاماقدیر" دئمه لری ایله بیر نئچه ایلدیر بایراق سورونو یاشاماقداییق. چئشیتلی بایراق اؤنریلری قوتسال بایراغیمیزی رنگلی پارچا آدلاندیرمالار ، اؤزلرین آلدادیب قارا بایراغی سیمگه آدی ایله سونماق کیمی واخت ایتیرن اولایلاردان سونرا ، سون زامانلار تیراختور بایراغینا ساریلانلارا چاتمیشیق. آراسیرا بیر سیرالاری تیراختور بایراغین میللی بایراق آدلاندیریرلار!!! خارجده بیر ایکی توپلانتی دا قیرمیزی پارچالار گؤتورنلرده اولوب. چوخ ماراقلی دیر کی بئله جه دینمز سؤیلمز بو رنگی یئذیتمک ایسته ینلرین ایزین آمئستردام توپلانتیسیندادا گؤرمک اولوردو. دیوان هیأتی آرخاسینداکی قیرمیزی پارچانین یئرلشمه سی بو اینسانلارین نه یاپماق ایسته دییینی آچیق گؤستریر. بیرلیکدن دانیشان بیر قوروم اوچون بئله جه یوکلمه (تحمیل ائتمه) اویونلار یاراشماز. میللی بایراق حاقدا "رنگلی انقلابلارین جاذبه سی و یوموشاق انحراف" مقاله سینده آچیقلاما وئرمیشم. میللی بایراغی میللت اؤز جسارتی ایله اونایلامالیدیر. قالادا یاپیلدیغی کیمی. گیزلیجه، اویونبازلیقلا، یوموشاقجا بیر پارچانی میللی بایراق اولاراق قوتساللاشدیرماق اولماز.
سون اولاراق میللی قازانجلاریمیز آدینا بو توپلانتیا قانتیلانلارا و بو توپلانتی نین دوز یولدا حرکت ائتمه سی اوچون چالیشانلارا، هابئله میللی قازانجلاریمیز آدینا توپلانتی نی ائلشتیرنلره اؤز سایغی و سئوگیلریمی بیلدیریرم.