سایین علیرضا اردبیلی
تنقید ائتدیینیز یازی-نین فعاللار طرفیندن
یاییملانان موراجیعت-له علاقه سی یوخدور
ا. اورمولو
۷ آوقوست ۲۰۰۸تاریخینده یایمیش اولدوغونوز "عوموم ميللی قرارلار وٸرمك مٸكانيزملری"
(
http://www.azadtribun.net/x19230.htm
) آدلی یازینیزدا میللی سیمبول اؤنریسی حاقیندا ايلك تشبوثون ۷ ايول ۲۰۰۸ تاريخلی
بير يازيدا آرايا قويولدوغونو قید ائدیب و آشاغیداکی سطیرلری ایسه او تشبوثه منسوب
ائتمیشسینیز:
"آذربايجان، و اؤزلليکله ده گونئي بؤلمه سي بو گون او دورومدا دييلدير کي چئشيتلي
تشکيلاتلارين يارانماسينا ايزين وئرسين...،"
"تشکيلات ياراديب و اونا بايراغ ياراتان شخصلر گله جکده اؤز ايشلري نين مسئولييتين
داشيياجاقلار."
"بايراغ مسئله سي ياخين گونلرده بير دفعه ليک چؤزولمه ليدير. اوندان سونرا، سئنئر
(مرز) و اليفبا قونولاري گوندمه چيخاريليب و چؤزولمه لي اولاجاقلار."
دَیرلی علیرضا به ی!
گونئی آذربايجان ميللی حرکتی سيمبولو اؤنریسی حاقیندا اولان موراجیعت ۷ ایول ۲۰۰۸
تاریخینده دئییل ۳ ایول ۲۰۰۸ تاریخینده یاییلمیشدیر و اوسته لیک سیزین اؤرنک
گتیردیینیز ـ یوخاریداکی ـ سطیرلر کسینلیکله بو موراجیعتده مؤوجود دئییلدیر.
"ميللی بيرليگه دوغرو!" باشلیغی ایله ۳ ایول ۲۰۰۸ تاریخینده یاییملانان گونئی
آذربايجان ميللی حرکتی سيمبولو اؤنریسی حاقیندا اولان موراجیعتی ايضاحلاری و
آچيقلامالاری ایله بیرلیکده عرب و لاتین الیفبالاریندا آشاغیداکی لینکده اوخویا
بیلرسینیز:
http://millisimbol.blogfa.com/post-7.aspx
ائله جه قید ائتمک لازیمدیر
کی٬ بو تاریخه قدر بو موراجیعتین ایکینجیسی یاییلمامیشدیر. سیزین بیرینجی چاغیریش
دئیه نئچه سطیرینی اؤرنک گتیردییینیز یازی ایسه "ميللی بيرليگه دوغرو!" باشلیقلی
موراجیعتدن نئچه گون سونرا "بای بک" سیته سی طرفیندن یاییلمیش و او سیته یه
عاییددیر. حؤرمتلی بای بک-ین یازیسینی ایسه آشاغیداکی لینکده اوخویا بیلرسینیز:
http://www.11008.baybak.com/il_11008_say_398.azr
تنقیدینیزین یاییملانان
موراجیعت ایله علاقه سی اولمایان بیلگیلره اساساً یازیلدیغی اوچون٬ اورتایا
آتدیغینیز مسئله لر حاقیندا یازماق دا اولدوقجا چتیندیر. بونونلا برابر موراجیعت و
اونون ايضاحلاری و آچيقلامالاری-نی اوخودوقدان سونرا اؤز یازینیزین بیر چوخ
بؤلومونو قبول ائتمه یه جه یینیزی اؤن گؤرمه مک ده مومکون دئییلدیر.
آما بایراق مسئله سی حاقیندا بئله یازیبسینیز:
"بايراق مسئله سي اصلينده
گئنيش آنلامدا و ميللت سويه سينده تارتيشيلمالي بير مسئله دير. موعاصير دونيادا
بايراغين هر ميللت اوچون ان قاباريق سيموول اولدوغونو نظره آلساق٬ مسئله نين جيدي
ليک درجه سيني ده تصور ائده بيلريک. چوخ ميللتلرين بايراقلاري٬ اونلارين ميلي
ميتولوژي و تاريخي ديرلر و سيمووللارينا دايانماقلا٬ ان گئنيش ميللي مشروعيت صاحيبي
اولان٬ ان عالي قانون وئريجي اورقان طرفيندن معين لشميشدير. بوگون بوتون دونيادا
آذربايجاني تمثيل ائدن بايراق دا ائله بو ساياق بير پراسئس ين محصولو دور."
وئریلن موراجیعت و اونون ايضاحلاری و آچيقلامالاریندا٬ بیر یاندان یاشادیغیمیز
دورومدا بو مسئله نین میللت سویه سینده دارتیشیلماسینا هر هانسی بیر ایمکانین
اولمادیغی اؤته یاندان ایسه گونئی آذربايجان ميللی حرکتينی ايفاده ائدن بير
سيمبولون گرکلیلییینی گؤز اؤنونه آلاراق چخیش یولو اؤنریلمیشدیر.
[گئچیجی] سیمبول اوچون اؤنریلن طرحین یئنی اولمادیغی٬ میلی مشروعیته صاحیب اولان -
۱۹۱۸ ایلینده محمدامین رسولزاده و فتحعلی خان خویلو توسطو ایله یوکسلن - بایراغا
سون درجه یاخین و حتی اساسی عونصورلر اعتیبار ایله اونونلا عینی اولدوغو٬ میلی
مشروعیته صاحیب اولان بایراغا هئچ بیر شرطین ایچینده آلتئرناتیو اولا بیلمه یه جه
یی کیمی خصوصلار میللت سویه سینده دارتیشیلما احتیاجینی اورتادان قالدیراراق٬
موباحیثه آلانینی کیچیلتمه یه چالیشیلمیشدیر.
مؤوضوع گئچیجی سیمبول و یا گئچیجی بایراقدیر. آی و سککیز بوجاقلی اولدوزون استقلال
و بوتؤولوکدن سونرا آغ رنگه چئوریله جکدیر٬ آچیقلاماسی صورتی ایله قارا رنگه
بویانماسی اونون موقتی و گئچیجی اولماسینی قارانتییه آلمیشدیر.
یازینیزین دوامیندا آشاغیداکی جومله لری اوخویوروق:
"ميللي بير آتريبوت سٸچمك پراسٸسي٬ ايمكان قدر تكرار اولماز يا چوخ چتين تكرار
اولان اولماليدير. هٸچ ميللت يا او ميللته منسوب اولان قوروپلار٬ سياسي پارتيالار
يا شخصلر٬ كٸفلري چكنده٬ ميللي سيموول يارادماق٬ سٸچمك و يا لانسه اٸتمك هوسينه
دوشمورلر. بو سببدن ميللي سيمووللاري سٸچمك يا اونلاردا دهييشيكليك اٸتمك٬ هر
اؤلكهنين آنا ياساسينين ان اؤنملي بندلري كيمي اٸله چتينلشديريلير كي٬ هلم ـ
هلم اونلارا توخونماق اولماسين. دونيادا ميلتلرين ميللي آتريبوتلارينين
دييشيلمهسي نادير دن ده نادير بير حاديثه ساييلير. ميثال اوچون 2004 ـ ي ايلده
گورجوستاندا ميكاٸيل ساآكاشويلينين غرب يؤنلو مخمل اينقيلابيندان سونرا بايراق
دييشمهيه ايشاره اٸتمك اولار."
اؤنریلن میللی سیمبولون اؤنریلمه طرزی٬ سیمبولو اؤنرن و اونو مودافیعه ائدن میلی
فعاللارین چوخونلوغونون مخالیف اولانلار ایله دوزگون و منطیقه دایالی بیر دیالوق
سرگیله دیکلری و اؤنرینی مودافیعه اوچون بیر چوخ تحلیلی یازیلارین یاییلدیغی نتیجه
سینده٬ بوندان سونرا یئنی طرح ایله مئیدانا چیخماغی کئچمیش ایه قیاسدا خیلی
چتینلشدیرمکده دیر. بو آرادا تاخما آدلا یازانلار بئله باشاردیقلاری قدر قوراللاری
چئینه مه مه کله و موباحیثه قایدالارینا باغلی اولاراق سیمبولو ساوونماقدادیرلار.
وئریلن موراجیعتی اوخوسانیز (یوخاریدا لینک وئریلمیشدیر) اونون یازیلماسی و
آچیقلامالاریندا بیر چوخ اینجه مسئله لره توخونولموش و بیر چوخ سورولار دا
جوابلاندیریلمیشدیر.
میللی حرکتیمیزده سون زامانلاردا تحلیلی یازیلار و گئنیش موذاکیره لره احتیاج
دویمادان (و تاسفله گئنلده آگرئسیو تاویرلارلا) یئنی فیکیرلرین اورتایا چیخدیغینی
گؤزدن کئچیرمیش اولساق میللی سیمبول اؤنریسی بو خصوصدا استارنداردلاریمیزی یوکسلتمه
یی باشارمیشدیر. طبیعی کی بو نورملار گئت-گئده٬ تدریجله و بو کیمی دیالوقلار
ایچینده آرزو ائتدییمیز سویه یه یتیشه بیله جکدیر. بونا یئتیشمک اوچون ایلکه لر و
اوصوللاریمیزا باغلی قالاراق سویوق قانلی لیقلا یبیر-بیریمیزی ائله جه ده یئنی
فیکیرلر و دوشونجه لری تحمول ائتمه ییمیز گرکمکده دیر.
سایغیلاریملا
۹ آوقوست ۲۰۰۸