اورمودان گئچـن آتـلی
سعيد موغانلی
اورمــودان كـئـچــن آتـلـي
...قيلينجي قانا باتدي... گل اوخو بيزيم ديلي... بيزيم ديل اورمو ديلي...
.نازلينين قيوريم ساچلارينين آرديجيلليغيدير او، ساوالانين قارتال قاياسيندان،
دوزلو گؤلون عوثمان يومروغونا، ال- اله دوزولموش بالوو يالليسيدير. اورمو
دئدييين نازلي خاتينين گؤزهسيندن آخان گوزگولوكدور. آشيق آلمالاريلا، كال
قورالاريلا، گيلانارلاريلا چييين چييينه همي ده يئددي ايلليك اوزوملوكلرين سئودا
آغيسي و زولا چايينين سالماس گؤزهلليييدير، نئجه آغلاماسين چايلار، چايلارا ،
بوتون سئلوولاردان بير ساراي كؤچور و بوتون دنيزلرده سولماز بوغولور، اوندانديكي
بوقدهر دوزلودور اورمو، نازليدير اورمو
نييه داريخماسين " آزاد وطن "، نييه باغيرماسين " شهيد صابونچو"، " خان درهسيني"
ايكي اوزلو كافتارلار ساغير و ساغير قاليب" سولوق" اوره ييندهكي قاناليقلار ،
داها دده كاتيبين دوداغينداكي ساغليقلار " قولونجو" يورمور، اونداكي " گولتپه"
لرينه كول سپميشدير قاراقانجيم قودورغانلار.
گؤزهل گؤيچك " كهريز"لري بولانديرديلار، و ايستي سويا چاخير سپديلر،"گجين" دوزلرينين لالالاري نئيلهسين كي اينسان اينساني سئومير و چكمهسيني گئيدي بالوو يالليسي كور اوغلونون، قيلينجيني ايشيلداتدي « گيرهسونلو » توركلر، ياريمچيق گونشين اورهيي كئچدي، بئرنوو يالواريشلاري باشلاندي مياوالی عبدالرحمن كيشينين و ياللي نازيل اولدو يوجه تانريدان ؛
ياللي، ياللي دوزولسون
باشي شاللي دوزولسون
كيمسه ياللي گئتمهسه
ياردان الي اوزولسون
اينديجه ديل آچدي دوللو موصطافا، آشيق درويش، و دده وئيسلين گؤزلريندن ايشيقلاندي قوشما سئوگيسي « اقرا بسم ربك الذي خلق »
من آشيق سازا بندم
بولبولم يازا بندم
بئلهجه امام درهسينين شيرينلييندن باشلاندي آشيق فرهاد، و ميضراب كولونگويله فتح انتدي عشقي فاتحجهسينه ، بير اورهك فتح ائدهنده دئمه استانبولو فتح ائتدي، يونانا يورودو فاتح ساياغي.
بارماقلاريلا داراياندا قوردقوپوز سئوگيلينين ساچلاريني آشيق دهقان، آدم وورولدو حوا ننهيه و يارانيلدي اورمو آلماسي.
هرنه بهانهيدي. عشق و شهوت نامينه ياراندي قيزيل آلمالار، اينسان اينساني سئومهيه باشلادي آدام دا بهانهايدي، آسلي كرم باشلانغيجيايدي هر شئي و اودلا ياراندي، اودلا بيتدي يانيق كرمي.
يوجه تانگري ديله گلدي؛ « يانيق كرمي ماهناسينا دونيا يارانسين و آسلي عشقي ياشاديقجا ياشاسين ياشام» قوخولانديقجا قاباريق دؤشلر نازلي هئيواسيني يوللادي تانري.
مارميشو كؤوشنلرينه گونآيدين دئيهنده دوزلو نازلي، يئري گؤينهدي قاناليقلارين، واوزوملوك لره يئريكلهدي هابيل، بند بويو سيزلاتدي كامانچالاري هابيل، واغزالي آنيندا شهيد اولدو قارداشليق.
ناظيمين روزگار قانادلي آتليلاري يوگوردو بند برهيه، اورمودان كئچن آتلي... قيلينجي قانا باتدي و قانا باتدي ناظيم حيكمتين، اورخان ولينين، آتيلا ائلخانين قلملري، بيزيم شاعيراورهكلريميزده.
بند دئدييين سولماز بير سئوگيليدير كي آديلا كئفلهنير اورمو، باخ، عرفانين يئددينجي قاتيندا تيققيلدايير سردار مسجيدينين ساعات كئفليلييي.
اؤنونده دؤشهنميش كيتابلار آچيلير گؤيه. اودوركي باكريني شهرداري مئيدانيندان كارون چايينا دؤردهمه چكير و تانري ياواش-ياواش تامسينير سئوگينين دامازليغيندان، قوردلا قارتال يارانير، قيلينجلا قلم، هله ده ايكي ديلهيي اسگيكدي سئودانين.
اورمو نازليليغينين دوزلاغيندا يارانيش گؤيلونه دوشور قوپوزلا قادين ، كؤينهييندن چيخاريلير قوپوز دؤشلري و ساري تئللر حضرت علسگرين باغرين چارتدادير.
دويمهلنمهميش ياخالارين بوللورلوغو بنده سالير اوغوللاري ، امام درهسيندن بللي ايكن بوسوز، بالوو يالليسي آرتيقلاماسيدير.
قولونجو دونياسينين دده كاتيبلييندن گيرمهليسن يونيس امره گؤزلرينين ايشيلتيسينا ، اورمو آشيقلارينين حيماسي يالليلاريندا، ايلگيسي قورولور اينسانلا تانرينين ، گيره سونلو توركلرينين قيلينج چالما عيبادتلريندن اينانير اينسان آللاها و قيلينجاوغلو قيلينج ساييلير قوپوزلور قوردتورك سيفالسلام.
بئلهجه سئويش و دؤيوش باشلايير شيخ تپهسينين آذان چاغيندان ، قوي اينانماسين اينسان جيرتدانليغينا، كي قنوت توتاركن سردار مسجيدينين آللاه قوناقلاري آرخادان قمهلهنير، جيلولوق يارانير اينسانليق دونياسيندا.
جيلولار فاجيعهسينين كسيك مسلمان باشلاري مينارهيه چئوريلير، خاچلي زينقيرووچيلارين شئيطان هيريلتيسيندا.
بايقوش عظمتينده ياشادي اينسان" بَدن ديوار"لاري حاضيرلاندي آدام اوغلونون اؤلومو اوچون ، كسيك بوغازلارين" لا اله الا الله " سسي كسيلها كسيلده.
الله اكبر اوجامانليغي ياواشيدي قيزيل خاچلي پَدَرلرين شهوتلييينده و نازلينين ساچي كسيلدي، دوزلونون دؤشو ، بيزيم سولمازين ماوي گوزلري ارمني كشيشلرينين ياخاسيندا پارلادي و موسلمان گؤرونجه باش بير يانا دؤش بير يانا.
بو فاجيعه اوزونلوغوندا قارداش ماكي، داش ماكييا دؤندو و غئيرت دامارينا کورد- كيلسه قمهسي سورتوكدولجه اوزانيدي قارداش ماكي، سولدو سولماز سالماس.
بيزيم پاشالارين اللرينه ساغليق و اجركم عندالله ...
يوخسا ايللر بويو گئجيكديريلن اورمو كؤرپوسونو شهيد توركلرينين باشلاريندان تيكهجكدي مره كافيرلر ، كؤهلن آتلاري بودرهمهسين پاشا بابالارين ...
قيلينجلاري كوتهلمهسين « آسيايا بير قيسراق باش كيمي اوزانان»
آتليلاري آزالماسين ناظيم بَيلرين. گؤزلريندن اؤپهريم، ائلخان آتيلانين، عاريف اوزانلارين ،
بئلهجه دردليدير اورمو اورهيي، قانلی خاچلیلارين ميريلتیسيندان.
باشي ساغ اولسون يئكانلي نورالله خانين، شهيد صابونچونون، شهيد باكرينين و نهايت ياشاسين شهيد آزاد وطن.
اينديكي اورمو يالليسيندان تبريز يالليسينا بير" اوچآياق" دؤيمهسي لازيمدير، چال زيرناچي دده.
تكجه اورمو گؤلونون كؤرپوسوزلوك فاجيعهسينده سؤيله باش «جالمانچي»لارا، نازلينين چيچكلي دسمالي اللرينده، دنيز سينهسينده "آغاجدا لئيلك" گئتمهليديرلر كي دوزلو دنيز بيزيمكيديرسه ، داها بوغولماماليدير سولماز سارايلار.
-بوكؤرپو وورولماليديرسا دوزلولوغو سئوهن اورهكلريميزدن ديرهك وورولمالي.
-شهيد كلانترييه سؤيله اليقابارلي باغچيلارين اورهكلريني فتح ائتمهيه بير الله و اكبر داها لازيمدير.
قوي بير داها چالسين آشيق جنون يانيق كرميني، و بالوولو مسكين يوجه تانرييلا گؤز – گؤزه سئويشسين ، بوگون بوتون چايلارا كؤرپو سالير قوللاريميز و كاپيتان گؤزلريميز "ساريمارال" كيمي گلين گميلريني گميچييه دوغرو آپارير.
قوي تسبيح دنهلري كيمي يوز
بير نفس چكسين تورك آدالاري و آغداغدان، سايين قالادان، قارا آدادان، عوثمان
يومروغوندان، شرفخانا ليمانيندان اوجالسين گؤيلري...
گل اوخو بيزيم ديلی
بيزيم ديل اورمو ديلی
اورمودان كئچن آتلی
قيلينجي قانا باتدی
منبع:هفته نامه اولدوز یکشنبه
بیست وشش خرداد ماه (شماره