اوچ شعر مبارزه شاعیریمیز «خلیل رضا اولو تورک » دن
منیم بیر آز رحمیم گلیر
منیم
بیر آز رحمیم گلیر ساغلیغیندا اؤلنلره،
اؤز الی، اؤز آیاغییلا قبریستانا گئدنلره.
اینسان آدلی اوجالیقدان یاواش – یاواش ائننلره.
گونش کیمی دوغولموشکن کور چیراغا دؤننلره.
اؤلوم هاردان باشلانیر گؤر، اؤز قلبینه خیانتدن،
اؤلوم هاچان یاخینلاشیر؟ ال چکنده جسارتدن،
ماویلیکدن آیریلاندا قارتال بوکر قانادینی،
اینسان بوکور قانادینی آیریلاندا اولویتدن.
منیم بیر آز رحمیم گلیر اؤزونه قصد ائدنلره،
ساغلام، قاینار دوشونجه نی چولاق، شیکست ائدنلره،
سوسوب دوردو، گؤره-گؤره فنالیغی، فلاکتی،
سوکوتویلا گوللهلهدی اؤزوندکی لیاقتی.
حاقسیزلیغا گؤز یومانلار اؤز گؤزونو اوغورلاییر،
زاوال گؤروب لال اولانلار اؤز سؤزونو اوغورلاییر،
موباریزه مئیدانیندا کیم سیویشیب یایینیرسا،
یاواش-یاواش بو دونیادان اؤز-اؤزونو اوغورلاییر.
منیم بیر آز رحمیم گلیر توخلوغوندان اؤلنلره،
نفسسیز بیر کابینئتی یاریم دونیا بیلنلره،
بیرجه اوسکوک شؤهرت اوچون سینوو گئدن، یئریکلهین،
آیاق اؤپن، وظیفه نی گؤزلرینه تپنلره.
قولتوقلارا قیسیلدیقجا بیلمهدی کی، آزیر، چاشیر،
ناکیشییه یاخینلاشان کیشیلیکدن اوزاقلاشیر،
گذشت ائتدی بیر لیانا افو ائلهدی افیلیگی،
اوریینی باسیب یئدی قورخاقلیغی، افللیگی.
رحمیم گلیر عموربویو مرد بیر آددیم آتمایانا،
دونیا بویدا سعادتدن بیرجه گیله دادمایانا،
رحمیم گلیر خسیسلره، گدالارا،
بؤیوک اولما ایمکانینی الدن وئرن خیردالارا.
من اونلاری
سیلکهلمک، سیلکهلمک ایستییرم،
جلیز، کیرلی دویغولاری گوللهلمک ایستییرم،
بو دونیانی میسکینلردن تمیزلمک ایستییرم،
تمیزلمک… اونو بیر آز عزیزلمک ایستییرم.
حیات دوشونجه لری...
سن ائله بیلمه کی، کؤچدوگوم زامان ،
دونیادان بیریوللوق کؤجهجهیم من.
بیر دفعه اؤلونجه، بلکه مین دفعه،
اؤلومو تاپداییب کئچهجهیم من.
بیر گون اؤز یانیندا گؤرمهسن منی،
چیخ یاشیل باغلارا قوشلاری دینله،
اوکئان قودرتلی آراز نهرینی،
ساخلاماق ایستهین داشلاری دینله.
دینله کولکلری کولکلردهیم،
اورکلردن سوروش اورکلردهیم،
بوتون گوللردهیم، چیچکلردهیم،
بولودو شیمشکله پارچالایاراق،
ظولمتی نور ایله بوغاجاغام من،
غربده اولدوز کیمی باتسام، شرقه باخ !
شرقدن گونش کیمی دوغاجاغام من !
قانادلاناجاغام سنین یانینا،
قیشلا البیاخا ایلک باهار ایله،
ساوالان داغینین زیروهلریندن،
غربه شرقه دوشن شوالار ایله.
ایتیب-باتماق اوچون یارانمامیشام،
دوننم، بوگونم، گلهجهیم من !
بیر گون بو دونیادان گئتسم ده نه غم،
دونیایا یئنیدن گلهجهیم من !
اینام
او
گون، منجه گله جک:
یاخشی اوغوللارینی تانیاجاق آذربایجان.
(...)
یئتیشمیش
مئیوه لرینی باغدا کیمسه درمه یئجک
سئومه دیگی بیر اینسانا کیمسه کونول وئرمه یه جک.
قالمایاجاق ایش
باشیندا نه بیر ساتقین، نه بیر کوله
قالستوکلو کئرتئن کئله.
ایزی، توزو
قالمایاجاق میسگین لرین جیلیزلارین.
بو جیرلارین، بو توزلارین.
قوبوستاندا
قایالارا
ائپوپئیا حک ائده جک تئزه نسیل اوغوزلارین!
قالمایاجاق ایش
باشیندا بو کلاسسیک قورباغورلار،
گوزلری ساغ اولا -اولا قلبی کورلار.
او گونون اوغروندا
من ۲۴ساعتیمی ۲۵-ئه چئویردیم،
بو کوللونگ بدنیمله چاپدیم، داغلار دئویردیم.
او گون مطلق گله جک،
بورونموشم آغ توزا، هله گورن یوخ منی.
دورد عمان آیناسیندا
برق ووراجاق گوندوزوم.
اوزخوشونا گلمسه گتیرجم من اوزوم.
قایناق : http://www.xelilrza.org/az/